د هېواد کشفي او امنیتي ځواکونو په تازه راپورونو کې ویلي چې د میلیونونو ډالرو او یورو د قاچاق هڅې د هېواد له بندرونو څخه شنډې شوې دي. په دې تړاو یو شمېر کسان نیول شوي، او اړوندې قضیې یې د قانوني تعقیب لاندې دي. چارواکي وایي چې د قاچاقي شبکو د فعالیتونو په وړاندې جدي اقدامات روان دي.
د سرای شهزاده څخه د «هندوکش غږ» سرچینو هغه راپورونه رد کړي چې د ځینو رسنیو لهخوا خپاره شوي وو. په دغو راپورونو کې ویل شوي و چې امنیتي ځواکونو په کابل کې د صرافانو د وهل ټکولو هڅې کړي دي. سرچینې وایي چې د پولي بازار چارې په عادي توګه روانې دي، او دغه ډول ادعاوې حقیقت نه لري.
بلخوا، تېره ورځ د افغانستان بانک په یوه اعلامیه کې ډاډ څرګند کړ چې د هېواد پولي بازارونه په دقیقه توګه تر څارنې لاندې دي. بانک ویلي چې د هر ډول اقتصادي فشارونو پر وړاندې کافي مالي سرچینې په واک کې لري او د افغانۍ ارزښت ثبات ته ژمن دی.
د یادونې وړ ده چې په دې وروستیو کې د ډالر ارزښت د افغانیو په مقابل کې د ځینو راپورونو له مخې لوړ شوی دی. مسؤلین ډاډ ورکوي چې د هېواد اقتصادي نظام د هر ډول غیر قانوني عملونو او قاچاق څخه ساتلو لپاره خپلې هڅې دوامداره ساتي.