د ماليې وزارت او مصور تجارتي شرکت تر منځ د هېواد په دولسو ګمرکونو کې د مالياتي تېښتو، نشه يي توکو، وسلو او نورو منع شويو توکو د مخنيوي په موخه ۱۱۳ ميليونه او ۳۰ زره امريکايي ډالرو په ارزښت د سکنرو د نصب تړون لاسليک شو.
د چارو ادارې د پانګونې او اسانتیا رئیس، انجنیر مولوي احمد ضیاء خالد په ګمرکي بندرونو کې د سکنرونو لګولو پروژې د تړون د لاسلیک په مراسمو کې وايي: د امنیت د لا ټینګښت په موخه، د هېواد په دولسو ګمرکي بندرونو (تورخم، حيرتان، سپين بولدک، اسلام قلعه، تورغونډۍ، نيمروز، خوست، پکتيا، اقینه، ابونصر فراه او شیرخان بندر) کې د سکنرونو نصبولوپروژه پلې کېږي.
د ښاغلي خالد په وينا په دې پروژه ۱۱۳ ميليونه او ۳۰ زره امریکایي ډالر پانګونه کېږي چې ودانیزې چارې به یې په ۲ کلونو کې بشپړې شي او ۲۰۰۰ کسانو ته به پکې مستقیم او غیر مستقیم ډول د کار زمینه برابره شي.
يادو مراسمو ته د مالیې وزارت د پالېسۍ مرستیال انجنیر سلطان محمد زبیر وايي: په ګمرکي بندرونو کې د معیاري سکنرونو لګولو پروژه یوه مهمه پروژه ده، چې په پلي کېدو سره به یې هېواد ته په قاچاقي ډول د منعه شویو توکو د وارداتو او صادراتو مخنیوی وشي.
ښاغلی زبير همدا رنګه زياتوي چې په تېر کې د معیاري سکنرونو د نشتون له امله ګمرکي خدمتونه په معیاري ډول نه دي تر سره شوي چې له امله یې مالیاتي تېښتې، د نشه یي توکو، وسلو او نورو منع شویو توکو قاچاق ته زمینه برابره شوې وه، چې د دې پروژې په پلي کېدو سره به یادې ستونزې هوارې شي.
د يادولو وړ ده چې په تېر کې د ګمرکونو ډېر شمېر عوايد شخصي جيبونو ته تلل چې د اسلامي امارت له حاکميت راوروسته په شفاف ډول حکومتي بودجې ته جمع کېږي او هېره دې نه وي چې په دې ورستيو کې د عايداتو او او مالي سيستمونو د ډيجيټل کېدو په موخه ګڼ شمېر پروژې په لاره اچول شوي ترڅو په مالياتي حسابونو کې لا شفافيت رامنځته او د لاسوهنې مخنيوی وشي.