د ټولگټو وزارت مسوولین وايي، د کابل ـ کندهار د لویې لارې د پاتې برخو د بنسټیز ترمیم او بیا جوړونې کار پیل شوی دی، چې په ترڅ کې به یې دغه لاره بېرته په اساسي ډول جوړه شي.
له یاد وزارت څخه په خپره شوې خبرپاڼه کې ویل شوي، د ټولگټو چارسمبالي وزیر ملا محمد عیسی ثاني له یادې لویې لارې د څلورو برخو له کاري بهیر څخه لیدنه کړې.: «لومړۍ برخه يې له کابل څخه پیل تر ارغندۍ سیمې پورې، دويمه برخه یې له دراني بازار څخه پيل د ميدان وردگو ولایت اړوند تر زرنې سیمې پورې، درېيمه برخه يې له زرنې سیمې څخه پیل د یاد ولایت د سيد اباد ولسوالۍ تر مرکز او څلورمه برخه يې د سید اباد ولسوالۍ څخه پيل د ميدان وردگو ولایت تر عزيز قلعه سيمې پورې رسېږي، چې د اساسي ترميم او بیا رغونې کار يې څو ورځې وړاندې پيل شوی دی او مالي لگښت يې د ټولگټو وزارت له بوديجې څخه ورکول کېږي.»
د خبرپاڼې له مخې، د ټولگټو چارسمبالي وزیر د یادې لویې لارې قردادي شرکتونو ته ویلي، چې یاده لویه لاره په ښه کیفیت او ټاکل شوې وخت پای ته ورسوي.
د يادونې وړ ده، چې ټولگټو وزارت پرو سږکال د يادې لویې لارې کار په ۷ برخو کې پيل کړی وو، چې اوس يې د کار د چټکتيا او غوره تطبيق په موخه په بېلابېلو نورو برخو وېشلی دی.
د کابل – کندهار لويه لار د هېواد يوه له مهمو اقتصادي لویو لاروو څخه ده، چې گاونډيو هېوادونو ته د کرنيزو او سوداگريزو توکو په لېږد رالېږد کې غوره اقتصادي رول لري او په اساسي ترميم او بیا رغونې سره به یې د کرنيزو او سوداگريزو توکو په چټک لېږد رالېږد کې د پام وړ اسانتياوې رامنځته شي.