د زندانونو چارو د سمون اداره وايي، د ا.ا.ا. د امیرالمؤمنین شېخ القران و الحدیث مولوي هبة الله “اخندزاده” (حفظهالله) په شفقت د ۱۴۴۵ه ق کال د روژې مبارکې میاشتې او کوچني اختر په مناسبت د عفوې او تخفیف په موخه د زندانونو چارو د سمون ادارې د اړوند زندانیانو د صادر شوي فرمان له مخې ۴۰۶ تنه خوشې شوي دي.
له یادې ادارې څخه په خپره شوې خبرپاڼه کې ویل شوي، له دې ډلې۳۳۸ یې نارینه محبوسین، ۴۰ یې ښځینه محبوسینې او ۲۸ تنه یې ماشومان محجوزین وو.
په خبرپاڼه کې له خوشې شوو کسانو غوښتل شوي، څو په راتلونکې کې داسې کړنې ترسره نه کړي چې د اسلامي شریعت او افغاني ټولنې د اصولو خلاف وي او بیا یې د زنداني کېدو لامل وگرځي.: «د دغې فرمان له مخې هغه محبوسين او محجوزين چې د حقالعبدۍ مسوولیت يې نه درلود، د خپل قيد ډېره موده يې تېره کړې وه او د اصلاح نښې په کې ليدل شوې وې، د سزا د عفوې او تخفيف وړ وگڼل شول.»
د زندانونو چارو د سمون ادارې د نظامي چارو مرستیال حبیب الله بدر له رسنیو وغوښتل چې هڅه دې وکړي د زندانونو په اړه دې بېبنسټه خبرونه نه خپروي.:«په افغانستان کې شته ټولې ملي او نړیوالې رسنۍ هر کله کولای شي چې له زندانیانو سره له نږدې وگوري، د هغوی حال و پوښتي او کره ریپوټونه پرې جوړ کړي.همدا اوس تاسو کولی شئ دغه محوبسین او محجوزین چې نن د عفوې او تخفیف په فرمان کې داخل او خوشې شول، زموږ له حضور پرته او له زندانه بهر ترې د زندان د وضعیت او د مسوولینو د چلند په اړه پوښتنه وکړئ او زه ډاډه یم چې مثبت ځواب به درکړي»
په خبرپاڼه کې ویل شوي، یاد شمېر محبوسین او محجوزین چې د سزا د عفوې او تخفيف په دې فرمان کې شامل وو، د روڼ بهیر په ترڅ کې یې ځینې خوشې شول او د ځینو په حبس او حجز کې کموالی راغی.: «دا لړۍ همدا اوس د هېواد په ټولو زندانونو کې روانه ده او له مخې به یې لیستونه د زندانونو چارو د سمون ادارې سره شریک او له اختر وړاندې به خوشې شي.»