د افغانستان اسلامي امارت د کابینې په ۲۳مه غونډه کې د نورو موضوعاتو د بحث سربېره د کابل ښار د ماسټر پلان په پلې کېدو پرېکړه شوې ده.
له ارگ څخه په خپره شوې خبرپاڼه کې ویل شوي، د کابل ښار د ماسټر پلان د پلې کېدو په اړه پرېکړه وشوه او طرزالعملو ته په کتو هره اداره مکلفه وگڼل شوه، تر څو د ماسټر پلان د پلې کېدو په برخه کې خپلې چارې او مسوولیتونه تر سره کړي.: «همدا راز کورنیو چارو وزارت ته دنده وسپارل شوه، چې د هېواد په بېلابېلو ولایتونو کې چې د کومو ولسوالیو مرکزونه د تعین او تغیر پرېکړه کېږي، باید ټول هغه ارگانونه چې په تغیر شوو ولسوالیو کې اداري واحدونه ولري، په پلاوي کې شریک شي او وروسته په گډه پرېکړه وکړي.»
همدارنگه د کابینې په دې غونډه کې د هېواد د سرحدي ولسوالیو په اړه د پوهنې، عامې روغتیا، ټولگټو چارو، کلیو پراختیا او بیارغونې، مخابراتو او معلوماتي ټکنالوژۍ وزارتونو ته دنده سپارل شوې، چې د سرحدونو، قومونو او قبایلو او کورنیو چارو وزارتونو په همغږۍ د خلکو ستونزو ته په جدي توگه رسېدنه وکړي او په ښه توگه خدمات دې ورته وړاندې کړي.