ارګ په يوه خبرپاڼه کې وايي چې د افغانستان اسلامي امارت رئيس الوزراء ملا محمد حسن اخند په مشرۍ د کابینې اتمه غونډه هېواد ته د بې کيفيته تېلو د وارداتو په مخنيوي، او د رکشو د راواردولو او ښارونو کې د ګرځېدو د طرحې اړوند بحث شوی.
خبرپاڼه زياتوي چې د کابينې غونډه کې د فرامینو او حکمونو د تعقیب او نظارت لوی رئیس مولوي شمس الدین شریعتي په مشرۍ پلاوي ته دنده سپارل شوې، چې هېواد ته د بې کیفیته تېلو د وارداتو د مخنیوي اړوند دې د اقتصادي معاونیت د طرحې په پام کې نيولو سره هر اړخیزه څېړنه وکړي او وروستی راپور دې د کابینې غونډې ته وړاندې کړي.
د خبرپاڼې پر بنسټ همدا راز د کورنیو چارو وزارت په مشرۍ یو پلاوي ته دنده سپارل شوې چې هېواد ته د رکشو واردولو او په ښارونو کې د ګرځېدو اړوند یوه طرحه جوړه کړي او پایله دې د کابینې غونډې ته وړاندې کړي.
د بې کيفيته تېلو د مخنيوي په اړه اقدام داسې مهال ترسره کېږي چې هېواد کې د بې کيفيته تېلو شتون موټر چلوونکي اندېښمن کړي وو، او د ډېر شمېر موټرو د خرابوالي لامل کېده.