د ریاستالوزراء اقتصادي مرستیال، ملا عبدالغني برادر په مشرۍ د اقتصادي کمېسیون نوبتي غونډه کې د کرنې او مالدارۍ سکټور د پراختیا ملي پالیسي تائید شوه.
اقتصادي معاونیت وایي، د کرنې او مالدارۍ سکټور میکانیزه کول، د یاد سکټور د څېړنیزو او ترویجي سیسټمونو پراختیا، د اوبولګونې سیسټمونو مدیریت، د کرنې، اوبولګولو او مالدارۍ په برخو کې د پانګونې ملاتړ او باکیفیته کرنیزو او حیواني محصولاتو ته د خلکو لاسرسی د دې پالیسۍ اساسي موخې دي.
سرچینه زیاتوي، چې په دې غونډه کې د کبانو روزنې سکټور د پراختیا طرحه هم تائید شوه. د دې طرحې له مخې به د پانګونې له لارې په ۶۵۰۰ هکټاره ځمکه د کبانو د تولید او روزنې ۷۷۰۰ کوچني، متوسط او لوی فارمونه جوړ شي.
د معلوماتو له مخې، د دې طرحې په تطبیق سره به په مستقیم ډول ۵۰ زره او په غیر مستقیم ډول به ۲۵۰ زره هېوادوالو ته د کار زمینه برابره شي.