د کرنې، اوبولگو او مالدارۍ چارسمبالي وزیر عطاءالله عمري په افغانستان کې د ملگرو ملتونو د سر منشي له ځانگړې استازې رزا اوتنبایوا سره لیدلي دي.
له کرنې وزارت څخه په خپره شوې خبرپاڼه په دې لیدنه کې د ملگرو ملتونو له استازې غوښتل شوي، چې په افغانستان کې د کوکنارو کښت صفر شوی، خو نړیوال دې افغان بزگرانو ته د بدیل معیشت په برخه کې مرسته وکړي.«هیله لرو چې د ملگرو ملتونو اداره او د کرنې په برخه کې فعالې نورې موسسې د کوکنارو د بدیل کښت په معرفي کولو او له بزگرانو څخه د ملاتړ په هکله لا ډېر تمرکز وکړي، اسلامي امارت د کوکنارو په کښت بندیز لگولی او زموږ هیله دا ده چې د بزگرانو ملاتړ وشي او د دوی لپاره مناسب بدیلونه چمتو شي ترڅو دوی د ژوند اړتیاوې پوره کړي.»
د ملگرو ملتونو د سر منشي ځانگړې استازې ویلي، د دوحې په درېیمه ناسته کې به په افغانستان کې د خصوصي سکټور، بانکدارۍ او نشهیي توکو پر مسئلې خبرې وشي، چې پکې د ۲۵ هېوادونو، درې نړۍوال بنسټونه او د اسیایي بانک او پراختیایي استازي گډون کوي.
د مېرمن رزا اوتنبایوا په وینا، د دوحې په غونډه کې د اسلامي امارت د استازي گډون د کوکنارو د بدیل د معرفي کولو او د تمویل کوونکو د پام اړولو لپاره مهم دی او دا یو ښه فرصت دی.
په دې لیدنه کې د کرنې وزارت مرستیال مولوي صدراعظم عثماني د ملگرو ملتونو پر بېتفاوتۍ او نه پاملرنې نیوکه کړې.: «اسلامي امارت په افغانستان کې د کوکنارو کښت صفر ته راټیټ کړ، خو ملگري ملتونه او د هغې همکارو موسسو د افغانستان خلکو او بزگرانو ته هېڅ کار نه دی کړی، په داسې حال کې چې د کوکنارو په کښت بندیز د افغانستان او نورو هېوادونو په خلکو مثبت اغېز کړی دی.»
د ملگرو ملتونو د پراختیايي پروگرام د دفتر مرستیالې ثریا بوزرکوا ویلي، چې موږ باید د کوکنارو د کښت پر بدیل کار وکړو ترڅو د بزگرانو اړتیاوې پوره کړو. موږ به خپلو هڅو ته دوام ورکړو او زموږ همکاري باید دوه اړخیزه وي.
د کرنې، اوبولگولو او مالدارۍ وزارت په افغانستان کې د کوکنارو پر کښت د محدودیت له لگولو وروسته، په خپلو کمو امکاناتو د کوکنارو د بدیل کښت لپاره پينځه کلنه طرحه جوړه کړې او د هغې د پلې کولو لپاره کار کوي.
اوسمهال په هېواد کې د کوکنارو کښت صفر شوی او په هغو سیمو کې چې کوکنار کرل شوي وو، د کورنیو چارو وزارت له لوري له منځه یوړل شول.