د کرنې، اوبو لگولو او مالدارۍ وزارت وايي، اوسمهال د کندهار په ۱۹ ولسوالیو کې د سېلابونو د مخنیوي، د ځمکې لاندې اوبو د پیاوړتیا، د خاورې د تخریب د مخنیوي او د رسوبي موادو او اوبو د مدیریت په موخه ۱۹ چکډیمونه جوړېږي.
له یاد وزارت څخه په خپره شوې خبرپاڼه کې ویل شوي، د دغو چکډيمونو د جوړولو په ترڅ کې د کندهار ولایت د خاکرېز په ولسوالی کې د موسمي اوبو مدیریت په موخه د چکډیم جوړولو چارې ۹۵ سلنه بشپړې شوې دي.
د خبرپاڼې له مخې، یاد چکډيم ۶۵ متره اوږدوالی، ۳۰ متره لوړوالی او پينځه متره سور لري، چې د یوې میاشتې په ترڅ کې به یې رغنیزې چارې بشپړې او گټې اخیستنې ته به وسپارل شي.: «یاد چکډیم به د اوبو د سطحې په لوړوالي کي گټور تمام شي او تر ډېره حده به د یادې سیمې د اوبو ستونزه هواره او یو شمېر خلکو ته پکې د کار زمینه هم برابره شوې ده.»
د کرنې او اوبو او انرژۍ وزارتونو ویلي، غواړي د هېواد په هره ولسوالۍ کې یو چکډیم جوړ کړي، چې هم بزگرانو ته اوبه برابرې کړې او هم د وچکالۍ پر وخت د ځمکې لاندې اوبه تغذیه کړي.