یحیی ابراهیم السنوار چې د حماس اسلامي غورځنګ یو له وتلو څهرو او د فلسطین د مقاومت یو مهم مشر و، د ۱۹۶۲ کال د اکتوبر په ۲۹مه د غزې په تړانګه کې د خان یونس د کډوالو په کمپ کې وزېږېد.
د یحیی السنوار کورنۍ د ۱۹۴۸ کال د عربو او اسرائیلو جګړې پر مهال له عسقلان څخه بېځایه شوې وه؛ السنوار د خپل ژوند له ابتدا څخه د اشغال ضد فعالیتونو کې بوخت و او خپلې زدهکړې یې د غزې په اسلامي پوهنتون کې د عربي ادبیاتو په برخه کې بشپړې کړې.
یحیی السنوار ډېر ژر د حماس یو کلیدي غړی شو او د شیخ احمد یاسین رحمه الله تر اغېز لاندې راغی.
سنوار په ۱۹۸۸ کال کې د اسرائیل ضد فعالیتونو له کبله څلور ځله د ابد بند سزاء باندې محکوم شو، خو ۲۳ کاله بنديتوب ورته دا فرصت ورکړ چې عبري ژبه زده کړي او د اسرائیلو له سیاستونو ژورې زدهکړې وکړي.
نوموړی په ۲۰۱۱ کال کې له زندان څخه د ازادېدو سره، په چټکۍ د حماس یو له وتلو مشرانو څخه شو او په ۲۰۱۷ کال کې د غزې تړانګې لپاره د حماس سیاسي دفتر مشر وټاکل شو.
یحیی السنوار د حماس د کورني استخباراتو سازمان «مجد» بنسټ ایښودونکی هم و، چې د اسرائیلي جاسوسانو او د دوی نفوذي کسانو په پېژندلو او تعقیبولو کې یې مهم رول درلود.
نوموړي د حماس د مقاومت عملیاتو په پلان جوړونه کې کلیدي رول ولوباوه، په ځانګړي ډول د ۲۰۲۱ کال د قدس شمشیر جګړه او د ۲۰۲۳ کال د الاقصی طوفان عملیات.
د ۲۰۲۴ کال د اګست په ۶مه، د اسماعیل هنیه تر شهادت وروسته، د حماس د سیاسي دفتر رئیس وټاکل شو او خپل ژوند یې د اسرائیلو د اشغال پر ضد مبارزې ته وقف کړ؛ بالاخره د ۱۴۴۶ کال د ربیعالثانی په ۱۳مه، د صهیوني رژیم سره په یوه جګړه کې د شهادت لوړې درجې ته ورسېد.