د یوناما راپور جوړونکی د غرب یا کفري نړۍ له زاویې اسلامي امارت ته ګوري او په خپله تله یې تلي.
امر بالمعروف، نهي عن المنکر د هر مسلمان دیني او اسلامي وجیبه ده چې، له منکراتو څخه ځان او د ټولنې نور وګړي وژغوري او په بالمعروف باندې تاکید وشي ترڅو په شرعي او اسلامي احکامو برابر شو.
د افغانستان اسلامي امارت ویاند مولوي ذبیح الله مجاهد د یوناما د خپور شوي راپور په غبرګون کې ويلي: د امربالمعروف، نهي عن المنکر او سمع شکایاتو وزارت د پروسیجر په اړه د یوناما نیوکې بې ځایه دي، کوم احکام چې د امربالمعروف، نهی عن المنکر او سمع شکایاتو وزارت لخوا توصیه کېږي هغه معلوم اسلامي احکام دي؛ دلته دا برخه په ټوله معنی واضیح شوه.
یوناما دې په دې وپوهېږي چې افغانستان کې په زرګونو تنو نارینه او ښځینه وو د شرعي او اسلامي نظام د جوړېدو په پار خپل سرونه دې لار کې نذرانه کړل؛ دا پښتنه او اسلامي ټولنه دې، د غربي لیدلوري څخه نه ارزوي، بلکې د مسلمانې ټولنې په څېر دې وارزول شي؛ د دې ولسونو د قربانیو قدرداني دې وشي.
دا چې د ملګرو ملتونو سیاسي استازولۍ/یوناما په خپل یوه تازه راپور کې ویلي چې، د اسلامي امارت له خوا سینګارتونو، له محرم پرته له ۷۸ کیلومترو څخه د زیات سفر، عامه پارکونو، لوبغالو او عامه حمامونو ته د ښځو پر تګ بندیز، لګولی، دغه کړنه اصلاً د شریعت اصولو مطابق ښځو ته دحقونو د ورکړې په معنی ده.
دا چې یوناما د ښځو پر وړاندې د سینګارتونو، بندول، له محرم پرته اوږد سفر کول، عامه پارکونو، لوبغالو او حمامونو ته پر تګ بندیز یا پابندي لګولې، دا کړنه د بشر د حقونو خلاف ګڼي، دا ممنوعیت په دې معنی نه ده چې، په ښځو دې د کار ساحه راتنګه کړي، دوی ته دې ستونزې او مشکلات پیدا کړي، برعکس دا کړنه د ښځینو د حقونو د تامین او عزت په موخه ترسره شوې، ترڅو په پرده کې ژوند وکړي.
یوناما وایي چې، مونږ په دوه برخو کې کار کوو، لومړۍ برخه یې د حکومت او عوامو ترمنځ د سیاست چارې پرمخ بېول دي، د عوامو او دولت ترمنځ واټن کمول دي، دویمه برخه یې د بشر د حقونو ده چې، بشري حقونه تلف نه شي؛ متاسفانه، دوی په افغانستان کې د خپلو موخو ته د رسېدا په پار اپوټه روان دي.
اوس مهال د ملګروملتونو سیاسي استازولۍ/یوناما د عوامو او دولت ترمنځ واټن رامنځته کوي، د بشر حقونو ته په سپکه سترګه ګوري، کوم حقوق چې دوی د بشر لپاره ټاکلي، مسلمانان دې حقونو ته حیواني حقوق وایي چې، منکراتو ته دې پکې ترجیع ورکړل شوې وي.
لله الحمد، په افغانستان کې د اسلامي امارت په حاکمیت سره د ټولو اتباعو شرعي حقوق تامین دي، که هغه نارینه ده یا ښځینه، شرعی برخورد ورسره کېږي او د اسلامي شریعت احکام د قوانینو په څېر د اجراء وړ دي، په دې اړه له چا سره هېڅ ډول زور زیاتی او ظلم نه شوی، نه به وشي.