لومړۍ برخه
لیکنه: مبارز هروی
د مجاهدینو په نوم دوکانداران:
افغانستان په تېرو لسیزو کې د ډیرو بدلونونو او تحولاتو شاهد پاتې شوی دی؛ هغه بدلونونه چې ډېر یې د اشغالګرو له اشغال یا د هغوی له ماتې سره تړاو لري. دې بدلونونو د فرصتونو تر څنګ، محرومیتونه او کړاوونه هم له ځان سره راوړي دي.
د پخواني شوروي اتحاد له لوري د هېواد اشغال، په هېواد کې د ګڼ شمېر بدلونونو لامل شو چې له ډلې یې د جهادي تنظیمونو او ډلو راڅرګندېدو ته اشاره کولای شو.
په داسې یوه مرحله کې چې د اشغالګرو او د دوی د داخلي اجیرانو ظلمونه له اندازې اوښتي وو، د افغانستان غیور ملت په کمو او ناچیزو امکاناتو پاڅون وکړ، د خپل دین، خپلواکۍ او خاورې د دفاع لپاره یې جګړه پیل او د شوروي اتحاد پر وړاندې د بریا لپاره یې مبارزه پیل کړه.
سره له دې چې د افغانانو سپېڅلی جهاد یواځې د الله تعالی د رضا او د مظلومانو د دفاع لپاره و، خو په دې منځ کې ځینو کسانو له حالاتو څخه ناوړه ګټه پورته کړه، د جهاد له نوم او د اشغالګرو پر ضد د مبارزې له عنوان یې کار واخیست، د دنیا ناچیزه ګټه یې د آخرت په بې بدیله ګټه غوره وبلله.
ځینې کسان داسې هم وو چې د جهاد له بیرغ سره یې د الله اکبر نعره پورته کړې وه، خو په حقیقت کې د دنیا په واک او مقام پسې ګرځېدل او د دې لپاره یې له هېڅ ډول شریعت ضد عمل څخه ډډه نه کوله.
اسماعیل خان؛ هغه نوم چې د افغانستان د ډېرو خلکو، په ځانګړي ډول د هېواد په لویدیځ کې د جګړې، زور او په هرات د اوږدې واکمنۍ یاد تازه کوي، دی یو له هماغو دوکاندارانو څخه و چې د آخرت غوښتنې له شعار سره، د دنیا په ګټو پسې روان شو او ډېر خلک یې په چل او دوکه وغولول.
اسماعیل خان چې د جهادي قومندانانو له مشهورو څهرو څخه شمېرل کېږي، کلونه کلونه یې په سیاست او نظامي صحنو کې غوښن رول درلودلی دی، نوموړی د خپلو پلویانو لپاره یو داسې اتل دی چې د دښمن پر وړاندې ودرېد، خو د دې کیسې تر شا یوه بله مرموزه څهره هم شته؛ داسې چې ډېره کمه لیدل شوې او ډیرې کمې خبرې ورباندې شوي.
د دې نوموتي قومندان تر شا، یو داسې پټ ژوندلیک نغښتی دی چې له رسمي روایتونو او تبلیغاتي انځورونو سره هیڅ ورته والی نه لري؛ یو داسې ژوند لیک چې له جنجالي پرېکړو، کړنو او داسې سیاستونو ډک دی چې د خلکو پر برخلیک یې ژور او ناوړه اغېز پرېښود.
د مقالو په دې لړۍ (د یوه قوماندان توره څهره؛ د اسماعیل خان پټ ژوند او کړنې) تر عنوان لاندې، د باوري سرچینو پر بنسټ، د اسماعیل خان ژوند او پټو کارنامو او د ژوند تورو پاڼو ته کتنه کوو.
نور بیا…
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.