د کډوالو او راستنېدونکو چارو وزارت وايي، د یو ماشوم په گډون د پاکستان له بېلابېلو زندانونو څخه ۱۱تنه افغانان ازاد شوي دي.
له یاد وزارت څخه په خپره شوې خبرپاڼه کې ویل شوي، یو افغان ماشوم چې له ۲ کاله او شپږ میاشتو راهیسې د پاکستان په زندان کې بندي و، د خیبر پښتونخوا د کډوالو چارو اتشې له لوري تر خوشې کېدو وروسته په تورخم فرضي کرښه کې خپلو والدینو ته وسپارل شو.
په خبرپاڼه کې ویل شوي، د کډوالو او راستنېدونکو چارو وزارت په لوړه کچه له ملي او نړيوالو بنسټونو سره په گډه کار کوي، چې په غوره مديريت سره هېواد ته راستنو شوو افغان کډوالو ته اساسي حقوق او اسانتياوې برابرې کړي، چې له ستونزو او ننگونو څخه خلاصون ومومي او له خپلو کورنیو سره ډاډمن ژوند ولري.
همدارنگه د پاکستان له زندانونو څخه ۱۰ تنه هغه بندیان هم ازاد شوي، چې په پاکستان کې یې د قانوني اسنادو د نه لرلو له امله ۲ کاله او شپږ میاشتې بند موده تېره کړې وه، چې د نړیوالو پولیسو له لوري په تورخم کې افغان پولهساتو ځواکونو ته سپارل شوي دي.
د یاد وزارت د معلوماتو پر بنسټ، نن او پرون د نیمروز، هرات، کندهار او ننگرهار له لارې ۹زره او ۷۳۰ تنه افغان کډوال په خپله خوښه او جبري توگه راستانه شوي دي.: «د نیمروز د ورېښمو، د هرات د اسلامکلا، د کندهار د سپینبولدک او د ننگرهار د د تورخم له لارې څخه پخپله خوښه او په جبري توگه ۹۵ کورنۍ چې ۵۳۲ تنه کېږي له تورخم فرضي کرښې، ۱۵۲کورنۍ چې ۸۲۱ تنه کېږي د سپین بولدک فرضي کرښې له لارې له پاکستان څخه او په ایران کې مېشت څلور زره او ۷۹۷ تنه د هرات اسلام کلا او درې زره او ۵۸۰ تنه د نیمروز د ورېښمو له لارې څخه خپل هېواد ته راستانه شول.»
د خبرپاڼې له مخې، راستانه شوي کډوال د نورو مرستو په موخه د ملگرو ملتونو عالي کمېشنرۍ، د کډوالو او خوړو نړیوال سازمان دفترونو ته ورپېژندل شوي او دغه راز له هرې کورنۍ سره د اسلامي امارت له کړنلارې سره سم مرسته هم شوې ده.