پنج شنبه/ د دلوې ۱۳ مه
د ملګرو ملتونو د امنيت شورا په وروستي راپور کې ادعا شوې، چې ګنې په افغانستان کې د القاعده مرکزونه شتون لري.
د حکومت ویاند ذبيح الله مجاهد په يوه خپره کړې اعلامیه کې دا ډول ادعاوې ردوي او زياتوي، چې د ملګرو ملتونو له ادرس څخه په «اسلامي امارت» باندې د تور پورې کولو يو منظم پروګرام پيل شوی، چې تل پروپاګند وي.
په اعلاميه کې وړاندې راغلي، چې په افغانستان کې د القاعدې اړوند هيڅوک شتون نه لري، او حاکم نظام چا ته اجازه نه ورکوي، چې د افغانستان له خاورې څخه د چا پر ضد ګټه پورته کړي.
د ملګرو ملتونو د امنيت شورا په وروستي راپور کې ادعا شوې، چې اسلامي امارت له القاعده شبکې سره نږدې اړيکې او د دې ډلې ځينې مشران په افغانستان کې موجود دي.
په راپور کې د يو شمېر ولايتونو يادونه هم شوې، چې ګنې په دغو ولايتونو کې د القاعده شبکې روزنځايونه او مدرسې موجودې دي.
همداراز په راپور کې د پاکستاني طالبانو ترڅنګ د ازبکستان د اسلامي غورځنګ او د اسلامي جهاد اتحاد ډلو سره د اړيکو يادونه هم شوېده.
په راپور کې د داعش ډله د سيمې لپاره يو ګواښ بلل شوې، خو ویل شوي، چې د طالبانو د فشارونو له امله د داعش برېدونه کم شويدي.
د حکومت وياند ذبيح الله مجاهد د امنيت شورا د راپور په غبرګون کې وايي: «بدبختانه د امنيت شورا راپورونه له هغو منابعو سرچينه اخلي، چې شل کاله د خپلو ګټو لپاره د اشغال ترڅنګ ولاړ و او د افغانستان له امنيت، ازادۍ او ابادۍ سره حساسيت لري»
په اعلامیه کې زياته شوې ده: «هیله کېږي، چې د ملګرو ملتونو امنیت شورا پرېنږدي چې راپورونه يې د سياسي او اقتصادي منفعت طلبو د اهدافو ښکار شي او په افغانستان کې خپل حیثیت او باور له سوال سره مخ کړي»
یاده دې وي، چې له دې وړاندې هم د ياد نړۍوال نهاد لخوا ورته ادعاوې شوي چې د حکومت د ويندوی دفتر لخوا رد شوي او بې بنياده بلل شوي دي.