د احصایې او معلوماتو ملي اداره وايي، د روان کال په سلواغې میاشت کې څهباندې ۱۳۴ مېلیونه ډالرو په ارزښت صادرات شوي دي.
له یادې ادارې څخه په ځپره شوې خبرپاڼه کې ویل شوي، د احصايې او معلوماتو ملي ادارې د هېواد په کچه د روان کال د سلواغې مياشتې د صادراتو او وارداتو اړوند ارقام راټول او تحليل کړي دي.
د دې ارقامو له مخې په ياده مياشت کې د هېواد په کچه د صادراتو ټول ارزښت ۱۳۴,۱ مېليونه ډالر او د وارداتو ټول ارزښت ۷۹۳,۵ مېليونه ډالرو ته رسېږي.
د خبرپاڼې له مخې، دا په داسې حال کې ده، چې پرو سږکال په همدې مياشت کې د هېواد د صادراتو ټول ارزښت ۱۷۶,۷ مېلیونه ډالرو ته رسېد، چې د پرو سږکال د سلواغې مياشتې د صادراتو د ارقامو تحليل د روان کال د همدې مياشتې د صادراتو په پرتله ۴۲,۶ مېليونه ډالره زیاتوالی ښيي.:«له بل لوري د ۱۴۰۱ کال په سلواغه میاشت کې د هېواد د وارداتو ارزښت ۶۹۴,۶ مېلیونه ډالرو ته رسېد، چې د روان کال په یاده مياشت کې د ۹۸,۹ مېلیونه ډالرو په ارزښت زیاتوالی پکې راغلی دی.»
په خبرپاڼه کې ویل شوي، ارقام ښيي چې د تېر او روان ۱۴۰۲ کال په سلواغه مياشت کې تر ټولو زيات صادرات پاکستان، هند او متحده عربي اماراتو ته شوي دي.
همدا ډول د پرو سږکال په سلواغه مياشت کې تر ټولو ډېر واردات له پاکستان، ایران او چین څخه شوي وو او د روان کال په همدې مياشت کې تر ټولو ډېر واردات له ایران، چین او پاکستان څخه شوي دي.
افغانستان اوسمهال د هوايي دهلېزونو سربېره د اوسپنې پټلۍ له لارې هم له نړۍ سره نښلول شوی، چې هره ورځ پرې زرگونه ټنه صادرات او واردات کېږي.