د روزگان د چاپېریال ساتنې ریاست وايي، په تېر یو کال کې یې په دغه ولایت کې ۲۰۰ قیمتي مرغان چې په ناقانونه توگه نیول شوي وو، بېرته ازاد کړي دي.
د یاد ریاست مسوولین وايي، د یو کال موده کې یې ۲۰۰ بېلابېل ډوله مرغان د ښکاریانو له منگولو ازاد کړي او ښکاریان یې امنیتي ادارو ته سپارلي دي.
د چاپېریال ساتنې ادارې د مسوولینو په خبره، د هېواد د نورو سیمو په څېر په روزگان کې هم په ښکار کولو بندیز لگېدلی دی او د دغه ریاست د مسوولینو له لوري ښکاریان نیول کېږي او امنیتي ادارو ته ورپېژندل کېږي.
د ریاست مسوولین زیاتوي، په تېرو کلونو کې په دغه ولایت کې گڼ مرغان ښکار کېدل؛ خو اوس یې مخه نیول شوې ده.
افغان حکومت د هېواد په ټولو ولایتونو کې په ښکار کولو بندیز لگولی او له خلکو یې غوښتي، چې ښکاریان امنیتي ادارو ته ورپېژني.