یو شمېر رسنیو خبر ورکړی، چې روسیه د افغانستان په اسلامي امارت لګېدلي بندیزونه لرې کوي.
په ملګرو ملتونو کې د روسیې دایمي استازي “واسیلي نبنزیا” ويلي، چې مسکو پر اسلامي امارت د لګېدلو بندیزونو د لرې کولو په حال کې دی.
“یورو اکتیف” خبري شبکې ویلي، چې د طالبانو یوه پلاوي دوحه کې د نړۍوالې ټولنې له استازو سره ناسته درلوده.
نبنزیا یادې خبري شبکې ته ویلي، چې د طالبان د افغانستان اوسني واکمنان دي او باید د دغه حقیقت په درک کولو سره له دوی سره تعامل وشي.
د رسنیو د راپورونو په اساس ویل کیږي، چې تر دې وړاندې د روسیې ولسمشر “ولادمیر پوتین” او د دغه هېواد د کابینې یو شمېر غړو هم له اسلامي امارت سره د اړیکو په پياوړتیا او پر هغوی د بندیزونو د لرې کولو په اړه ورته څرګندونې کړې وې.
د افغانستان په اړه د قطر په پلازمېنه “دوحه” کې جوړه شوې درېمه ناسته د افغان حکومت لپاره د لاسته راوړنو څخه ډکه وه؛ دغه ناسته د ملګرو ملتونو د سرمنشي مرستیالې تر مشرۍ لاندې جوړه شوې وه، چې د ګڼ شمېر هېوادونو استازو په کې ګډون کړی و.