یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
څو ورځې وړاندې لوړ پوړو روسي چارواکو وویل چې روسي مشرتابه پرېکړه کړې چې طالبان به د ترهګرو له لیست څخه وباسي.
دا لومړی ځل نه دی؛ وړاندې هم روسي چارواکو دغه ډول څرګندونې کړې وې.
تمه کېږي چې نږدې وخت کې به دغه پرېکړه عملي شي، خو پوښتنه دا ده چې روسیه ولې دغه کار کوي؟
واک ته د ا.ا.ا له رسېدو وړاندې او وروسته روسیې له طالبانو سره د ترهګرۍ لیست کې د شمولیت سربېره ښې اړیکې درلودلې.
طالب مشرانو په مسکو کې ګڼو کنفرانسو کې برخه اخیستې او د ضمیر کابلوف په مشرۍ روسي چارواکو کابل ته سفرونه کړي دي.
روسیه فکر کوي چې د رسمي تعامل او بېلابېلو برخو کې همکارۍ له پاره اړینه ده چې نور هم ا.ا.ا ته ځان نږدې کړي او رسمي تعامل ته ننوځي.
د روسیې یوه وېره له داعش څخه ده؛ که څه هم واک ته د ا.ا.ا له رسېدو وروسته له افغانستان څخه د داعش لمنه ټوله شوې، خو روسیه په دې اړه د ا.ا.ا تجربې او همکارۍ ته اړتیا لري، څو روسیه کې لکه کراکس په څېر بریدونو مخه ونیسي.
بلخوا، افغانستان او روسیه پراخه سوداګري لري چې تېر زیږدي کال کې یې یو میلیارد ډالر سوداګري کړې ده.
روسیه د وریښمو له تاریخي لارې غواړي چې خپله سوداګري د افغانستان له لارې له سویلي اسیا سره پراخه کړي.
په دې اساس روسیه اړ ده چې په افغانستان کې له واکمن حکومت (ا.ا.ا) سره اړیکې پراخه او ځان نږدې کړي.
د ا.ا.ا هم د خپلې اقتصاد محوره پالیسۍ د پلي کولو او نړیوال ستیج کې د ملاتړ له پاره د روسیې همکارۍ ته اړتیا لري چې روسیې تر اوسه په ښه ډول همکاري کړې ده او ژر ده چې ا.ا.ا به د روسیې او چین په همکارۍ له اوسني ناسم سیاسي وضعیت څخه راووځي.