د نړیوالو رسنیو د راپورونو له مخې، روسیې د جګړې پای ته رسولو او امریکا سره د خپلو اړیکو بیارغونې لپاره واشنګټن سره د خپلو غوښتنو یو نوملړ شریک کړی دی.
راپورونه وایي، دا معلومه نهده چې مسکو د خپلو غوښتنو په نوملړ کې څه ځای کړي او په رښتیني توګه غواړي چې اوکراین سره سوله وکړي، که نه؟
د سرچینو په وینا، امریکا او روسیې د تېرو درېیوو اونیو پرمهال د یادو شرایطو په اړه مخامخ او په انلاین بڼه خبرې کړې دي.
دوی زیاته کړې، چې مسکو هغه غوښتنې وړاندې کړي چې له دې مخکې یې امریکا، اوکراین او ناټو سره شریکې کړې وې. د روسیې په پخوانیو شرایطو کې راغلي چې کییف به د ناټو غړیتوب نه ترلاسه کوي، اوکراین کې به بهرني ځواکونه نه ځای پر ځای کېږي او د کریمیا ترڅنګ باید څلور نورې سیمې چې خلک یې په روسۍ ژبې خبرې کوي هم روسیې ته ورکړل شي.
په ورته مهال امریکا د اوکراین له لوري د ۳۰ ورځني اوربند هوکړې منلو لپاره د روسیې ځواب ته په طمعه ده.