ليکوال: عبدالله زاهد
له کوم وخت څخه چې ا.ا.ا پر افغانستان حاکم شوی، سرتاسري امن او سوله راغلې له همغه وخت څخه د غرب او پرديو استخباراتو په خوښه ځيني پلورل شوې رسنۍ د ا.ا.ا ضد د دروغو خبرونه نشروي؛ بې ځايه ادعاوې، دروغجن او زهرجن تبليغات کوي.
له دغې جملې څخه يې يوه هم زاويه نيوز ده چې د نړيوالو استخباراتو د پروژو عملي کولو ته يې کار ويلی، همېش يې د زهرجنو تبليغاتو، دروغجنو ادعاوو او دروغو خپرولو سره د افغانانو ذهنونه مغشوش کړي؛ تر څو هغه هدف چې غربي استخباراتو ورته ورکړی پوره يې کړي.
نن يې يو راپور خپور کړی چې د پاکستان جيټ الوتکو د ننګرهار د مومندرې ولسوالۍ په باسول کې د پاکستاني طالبانو پر يوه مرکز بمبار کړی؛ د دې خبر هيڅ ثبوت هم د دوی سره نشته چې نشر يې کړي.
دغه خبر بالکل دروغ دی او په دغسي بې بنياده خبرونو سره نه يواځې زاويه نيوز والا بلکې پاکستان، د شر و فساد ډله او نور د افغانستان دښمنان غواړي چې ا.ا.ا بدنامه او د دوحې د تړون څخه سرغړونه يې وښيي.
په دغسي د دروغو خبرونو سره غواړي وښيي چې د افغانستان خاوره د کوم بل هېواد په ضد استعمالېږي.
دغه استخباراتي کړۍ په ګډه سره د افغانانو ضد نشرات کوي، دوی چې د افغانيت دعوه داران دي؛ خو ژبه يې د غرب او د هغو پاکستانيانو ده چې دوی يې همېش د مخالفت نعرې وهلي.
په تېر غلام رژيم کې حمدالله محب چې د امنيت مشاور وو؛ له ۹۱ او ۹۲ رياست څخه د يادې رسنۍ په نامه په ميليونونو روپۍ اخيستلې؛ ويل کېږي چې حمدالله محب د زاويه نيوز مالک دی چې اوس هم له بهرني جاسوسي سازمانونو څخه د دغې رسنۍ په نوم روپۍ اخلي؛ تر څو دلته په سيمه کې د هغوی پروژو ته تبليغات او د افغانانو ذهنونه په دروغجنو خبرونو او تبليغاتو سره خراب کړي.
پاکستان کې د ټي ټي پي د مبارزې د پرمختګ سره هره ورځ د پاکستان ميډيا او سياسيون يې پر افغانانو تورونه پوري کوي چې ټي ټي پي له افغانستان څخه پاکستان ته راځي؛ په بار، بار ټي ټي پي اعلاميې خپرې کړي چې موږ پاکستان کې سيمې په خپله ولکه کې لرو او ضرورت نشته چې له بهر څخه راشو. همدغسي افغان حکومت هم د پاکستان دغه تورونه رد کړي او ورته ويلي يې دي چې دا ستاسو خپله مسئله ده؛ ټي ټي پي له افغانستان څخه نه بلکې پاکستان کې دي او له هغه ځايه بريدونه کوي؛ خو دغه زاويه نيوز همغه د پاکستان خبره تکراروي او وايي چې د ټي ټي پي پر مرکزونو بريد شوی.
دوی هم د پاکستاني او نړيوالو استخباراتو په خوښه دغه خبره کوي؛ دوی ته هيڅ هم مهم نه دي بغير له ډالرو چې د نړيوالو استخباراتو له خوا ورکول کېږي.
که يو هېواد کې ميډيا فعاليت شروع کوي نو معلومه ده چې د هغه هېواد د قوانينو پر اساس به پر مخ ځي او هر دروغ يا بې ځايه تبليغاتو کولو پوښتنه به ترې کېږي؛ اما نن سبا د سوشل ميډيا دور کې هيڅ نه وي معلومه چې دغه ويبسايټ چا جوړ کړی او له کوم ځای څخه فعاليت کوي چې له همدغې نقطې څخه په کار اخيستلو د نړۍ استخباراتي لوبو ګرم ميدان همدا ميډيا ګرځېدلې.
د سوشل ميډيا په راتګ سره ډېرو د ژورناليزم حدود کراس کړه؛ هر يو کس راولاړېږي او سوشل ميډيا کې فعاليت کوي چې د ژورناليزم اصولو ته هيڅ نه ګوري؛ بس چې څوک يو څه پيسې ورکړي دوی ورته کار کوي؛ نه د خپل هېواد، نه اسلاميت او نه هم د خپل ولس د پرمختګ غم ورسره وي.
د سوشل ميډيا په دې دور کې د ځينو ځوانانو فکرونه له همدې لارې مغشوش شوي؛ دغه ميډيا دومره دروغ نشر کړي چې رښتيا او حقيقت بالکل پکې ورک کړي.
زاويه نيوز يوه له هغو رسنيو څخه ده چې يواځې يې د دروغو نشرولو ته کار ويلی، د پردي استخباراتي لوبو يوه نانځکه يې له ځانه جوړه کړې او هيڅ د کوم خبر ثبوت هم ورسره نه وي.
نړيوال استخباراتي کړۍ چې نه غواړي افغانان پر آرامه پاتې شي له دغسي ويبسايټونو او سوشل ميډيا څخه په کار اخيستنې غواړي د افغانانو ذهنونه مغشوش او په دروغو ويلو سره غواړي ا.ا.ا بدنامه کړي.
افغان ولسه!
د سوشل ميډيا او د پرديو تبليغاتو په جال کې راګير نه شئ! د نړيوالو استخباراتو يوه مهمه او مضره لوبه هم همدا ميډيا ده چې غواړي ستاسو ذهنونه مغشوش او بيا دغه امن ستاسو له سره واخلي؛ تر څو ستاسو په وينو سوداګري ته لاره پرانيزي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.