د سرحدونو، قومونو او قبایلو چارو وزارت وايي، د ټاکل شوي پلاوي له لوري یې د بدخشان د درېیو ولسوالیو اړوند سیمو کې یې د ډیورنډ فرضي کرښې او رسمي سرحدونو څېړنه او بررسي کړې ده.
له یاد وزارت څخه په خپره شوې خبرپاڼه کې ویل شوي، د بدخشان د واخان، زېبک او کرن منجان ولسوالیو د پلټنې، مطالعې او څېړنې لپاره د یاد وزارت د سرحدي بررسيو رئیس انجنیرغلام صدیق سباوون د یوه پلاوي په مشرۍ سفر کړی او په واخان ولسوالۍ کې یې له تاجیکستان سره ۴۳۴،۶۲ کیلومتره، له چین سره ۹۶ کیلومتره، له جمو کشمیر سره ۱۰۲ کیلومتره او له پاکستان سره ۲۴۶،۰۱ کيلومتره فرضي کرښه او رسمي سرحدونو مطالعه او بررسي کړي دي.: « دغه پلټنه په داسې حال کې شوې چې له شاوخوا درېیو لسیزو را په دې خوا د ډيورنډ فرضي کرښې او سرحدي پولو ته څوک د کتنې په موخه نه دي ورغلي. د دغې پلټنې په ترڅ کې د هېواد ارزښتمنې ساحې چې واخان او پامیرونه یې د یادولو وړ دي هم مطالعه او وڅېړل شوې.»
د خبرپاڼې له مخې، د ذکر شوو سیمو له ډلې پامیر چې د نړۍ د بام په نامه مشهوره سیمه ده د ګران هېواد افغانستان د بدخشان ولایت په واخان ولسوالۍ کې موقعیت لري او د سیمې په کچه د جیو پولیټیک او جیو ستراتيژیک ځای له نظره له خورا لوړ ارزښت او پوره اهمیت څخه برخمنه ده.
پرو سږکال داسې اوازې خپرې شوې، چې پاکستان غواړي واخان له افغانستان څخه جلا او خپله برخه یې وگرځوي، چې منځنۍ اسیا ته نږدې لاره پیدا کړي.
هغه وخت د ملي دفاع چارسمبالي وزیر مولوي محمد یعقوب مجاهد ویلي وو، چې واخان د افغانستان د سر حیثیت لري او هېچاته به اجازه ورنه کړي، چې کوم زیان ورته ورسوي.
واخان د بدخشان له مهمو ولسوالیو څخه شمېرل کېږي چې د پاکستان له نامنل شوې فرضې کرښې (ډیورنډ),جمو کشمیر، چین او تاجيکستان سره گډه پوله لري او د پامیر د واورینو غرونو د شتون له کبله د امو سیند یوه له مهمو سرچینو څخه شمېرل کېږي.
افغانستان له چین، تاجیکستان، ترکمنستان، ازبېکستان او ایران سره گډې نړیوالې پولې لري؛ خو له پاکستان سره تر اوسه پوله نه لري؛ ځکه ډیورنډ فرضي کرښه تر اوسه یو حکومت هم په رسمیت منلې نه ده او تر اټک پورې د افغانستان خاوره ده، چې د پخواني برېتانوي هند له لوري له افغانستان څخه جلا شوې ده.