د افغانستان بهرنیو چارو وزارت د هند او پاکستان ترمنځ د زیاتېدونکي کړکېچ په تړاو اندېښنه څرګنده کړې.
د یاد وزارت په اعلامیه کې راغلي چې سرپرست حکومت د سیمې امنیت او ثبات د ټولو هېوادونو لپاره مهم ګڼي او پر دې باور دی چې د وضعیت لا کړکېچن کېدل د سیمې د هیڅ هېواد په ګټه نه دی.
بهرنیو چارو وزارت پر دواړو لوریو غږ کړی، چې له زغم څخه کار واخلي او روانې ستونزې د تفاهم او متقابل درناوي له لارې هوارې کړي.
سرپرست حکومت ټینګار کړی چې سیمه کې د تلپاتې سولې او ثبات تأمینول یې د بهرني سیاست له بنسټیزو لومړیتوبونو څخه دي او ټولې خواوې باید له هر هغه اقدام څخه ډډه وکړي، چې د کړکېچونو زیاتوالي ته لار هواروي.
