هغه کسان چې په تېرو وختونو کې د شر او فساد ډلو د واکمنۍ پر مهال د بیت المال په خوړلو او چورولو روږدي شوي وو، تل له دې ناروا او حرامو لارو تغذیه کېدل، د خلکو او دولتي شتمنیو په لوټلو یې خپل پوستکی غټ کړی و، د جمهوریت له سقوط وروسته اړ شول چې د تېښتې لار خپله کړي، اوس ورته ډېره سخته ده چې په پردیو هېوادونو کې د تنهایۍ، بېوزلۍ او بېپیسو ژوند وزغمي.
دغه کسان چې تېر ژوند لیک یې د جنایت، غلاوو، بد اخلاقۍ او زورواکۍ ډک دی، اوس په دې هېله نه دي چې افغانستان ته بېرته راستون شي، په خپل ذهن کې دا هم نه تصور کوي چې که راستنېږي، نو څه به کوي او څنګه ژوند به پر مخ وړي!؟
له همدې امله، تښتېدلي هڅه کوي هره زړه رسۍ په منګولو کې ونیسي او د خپلې ابرو د پلورلو، د غربي دښمن او کافرو کړیو د لوبو په وسیله کېدلو سره غواړي تر څو د ځان لپاره پناه ځای پیدا کړي او په هر قیمت او د هر چا په لګښت د خپل ځان لپاره د یوې ګولې ډوډۍ لاره چاره وکړي.
د متحدي جبهې مشر سمیع سادات په یوه ویدیو کې (د ۸۰ تر ۱۲۰ ډالرو کوبای سګریټ په ښکاره کولو سره)، په ځانګړې ځانښودنې او کاذب باور سره هڅه کوي چې په یوازې ځان د سرپرست حکومت پر وړاندې راپورته شي او له امریکا، چې د افغانانو د ملت تلپاتې دښمن دی، د هر اړخیز ملاتړ غوښتنه کوي، ترڅو یو ځل بیا خپل بخت و ازمويي او شق القمر وکړي، ګواکې په یواځې ځان پوره پوځ دی.
هغه امریکا د ملګري په توګه یادوي او په مستقیم ډول ترې سیاسي او لوژستیکي ملاتړ غواړي؛ ادعا کوي چې دوی عملاً خپله جګړه پر مخ وړي او له ازآدۍ وروسته به داسې یو ډیموکراټیک حکومت رامنځ ته کړي چې د امریکا په ګټه به وي.
خو له دې پرته چې د هغه غوښتنه ناممکنه، ناشونې او غیر معقوله ده، په حقیقت کې یې اصلي هدف ځان ښودنه، په غرب کې د ژوند لپاره مالي سرچینې موندل، او د پردې تر شا د ځواکونو د لوبولو یوه وسیله ګرځېدل دي.
د دې شخصي هدف لپاره به څه تر دې اسانه وي، لکه په رسنیزه مرکه کې ګډون کول، ځان په رسنیو کې ښکاره کول، تشې او غیر واقعي خبرې کول او د یو داسې ملت پر وړاندې ځان برېښول چې د دغسې خلکو کیسې یې له ډېره وخته زده دي او د دوی پټې زاویې او کړنې له تېرو وختونو راهیسې د خلکو پر وړاندې ښکاره شوې دي.
هغه کسان چې په خپل وطن کې یې هیڅ بنسټیز ملاتړ نه درلود او د سرپرست حکومت په راتګ سره یې د تېښتې لار غوره کړه، اوس څنګه د مظلوم افغان ولس نوم په خوله اخلي، د هغوی لپاره فکر او پلان جوړوي او د هغوی په استازیتوب له دښمنانو مرسته غواړي، څنګه تمه لري چې د هغوی خبرې به په دې هېواد کې چا ته د منلو وړ وي، د دوی غوښتنې څرګندوي چې غواړي د افغانستان اوسني پرمختګونه ګډوډ کړي، د کافرو دښمنانو ناپاک لاسونه یو ځل بیا د افغانستان په وضعیت کې شامل کړي او ملت یو ځل بیا هغه بدو ورځو ته ور وګرځوي، چې په کې وینهتویدنه، جګړه او ویجاړي واکمنه وه.
سمیع سادات هغه امریکا ملګرې بولي چې پر افغانستان کې یې شل کاله تجاوز وکړ، ویجاړۍ یې رامنځ ته کړې، ملت یې د پرمختګ له لارې راوګرځاوه، افغانستان یې د قرضونو او ستونزو یوه لویه مصرفي ټولنه وګرځوله او د فساد او بېلاریو بازار یې وپړساوه.
روښانه ده چې داسې کسان د ملت لپاره هیڅ مثبت هدف نه لري او یواځې د رسنیو پر وړاندې د ځان ښودلو او په خپلو شخصي ګټو پسې روان دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.