د سنډې ګارډین په نوم هندۍ رسنۍ د دغه هېواد د چارواکو له خولې ویلي، نوی ډیلی په چټکۍ سره له کابل سره د اړیکو د پراختیا پر لور ګامونه اخلي. د سرچینې په وینا، د نوي ډیلي او کابل ترمنځ د اړيکو پراختیا د دواړو هېوادونو ستراتېژیکې ګټې خوندي کولی شي.
د دغې هندې رسنۍ په وینا، په افغانستان کې په ۲۰۲۱ کال کې واک ته د طالبانو له رسېدو سره سم د دواړو هېوادونو ترمنځ د اړیکو ښه کېدل ناممکن برېښېدل، خو په خبره یې، په دې وروستیو کې د دواړو هېوادونو ترمنځ د اړیکو د پراختیا لپاره تمایل ډېر شوی دی.
د سنډې ګارډین په وینا، کابل هم له نوي ډیلي سره د اړیکو پراختیا مهمه او ګټوره بولي، له همدې کبله یې هلته د افغانستان په استازولۍ د کس د نومولو لپاره مهم انتخابونه غوره کړي، چې له دې ډلې یو یې هم په دوحه کې د طالبانو د سیاسي دفتر د مشر سهیل شاهین زوی، نجیب شاهین دی او له دې انتخابه ښکاري چې کابل ته له ډيلي سره د اړیکو پراختیا خورا مهمه ده.
دغې رسنۍ د ځینو هندي چارواکو له خولې ویلي، چې هند باید له دغه فرصته په چټکۍ سره ګټه واخلي او له اوسني افغان حکومت سره ډيپلوماتیکې اړیکې پراخې کړي، هلته دې د زېربناوو په رغولو کې د پام وړ ونډه واخلي او دغه راز دې په نړیوال سیاست کې هم د افغانستان او افغانانو ملاتړ تضمین کړي.
د یادو سرچینو په وینا، دغه ستراتېژي د هند او افغانستان دواړو لپاره خورا ګټوره ده، چې په دې سره هند کولی شي له افغانستان سره د روغتیا، سوداګرۍ، بیارغونې او نورو برخو کې خپله همکاري لا پراخه کړي. سرچینې زیاته کړې، چې افغانستان اوسمهال هڅه کوي چې پر خپلو ګاونډیانو اتکا راکمه کړي او مخامخ د سیمې له هېوادونو سره راکړه ورکړه پیل کړي.