د ریاست الوزراء سیاسي مرستیال مولوي عبدالکبیر بېگاه ماښام په سپېدار ماڼۍ کې له کابل مېشتو سفیرانو او دیپلوماتو سره گډ روژه ماتی وکړ.
له ارگ څخه په خپره شوې خبرپاڼه کې ویل شوي، د روژه ماتي په دې مېلمستيا کې چې د اسلامي امارت د سیاسي کمېسیون او کابینې ډېرو غړو او چارواکو حضور درلود، په کابل کې د گڼو هېوادونو سفیرانو، شارژدافیرانو، د ملگرو ملتونو ، اروپايي ټولنې او اسلامي کنفرانس استازو گډون کړی وو.
د خبرپاڼې له مخې، مولوي عبدالکبیر د هرکلي ترڅنگ وویل، تمه لري په راتلونکي کال کې په کابل کې د مېشتو دیپلوماتانو او سفیرانو شمېر تر دې هم ډېر وي او نور هېوادونه هم خپل سفارتونه پرانېزي.: «اسلامي امارت د خپل اقتصاد محوره بهرني سیاست له مخې غواړي له ټولو هېوادونو سره ښې اړیکي ولري او د سیمې هېوادونه کولای شي په گډه سیمهییز نوښتونه رامنځته او پياوړي کړي.
اسلامي امارت لېواله دی چې له نړیوالو سره سیاسي، اقتصادي او فرهنگي اړيکې ولري، په سیمهییزو پروژو کې ونډه واخلي او د وصل د نقطې په توگه عمل وکړي.»
نوموړي ویلي، د افغانستان گاونډيان دې ډاډ ولري چې اسلامي امارت به هېچا ته هم د دې اجازه ورنه کړي چې د افغانستان له خاورې څخه ورته گواښ پېښ کړي.:«په سیمه او نړۍ کې ځینې کړۍ په افغانستان کې د داعش لپاره په تبلیغاتو لاس پورې کړی دی.
داعش نه یوازې د افغانستان، بلکې د بشریت، سیمې او نړۍ دښمن دی، اسلامي امارت دغه ډله په افغانستان کې ځپلې ده او هېڅوک یې باید د قوي ښودلو او پياوړتیا لپاره لابي ونهکړي.»
د رياست الوزراء سیاسي مرستیال وویل، هغوی چې په افغانستان کې يې ماتې خوړلې د افغانستان پراخې سیمهییزې اړیکې او تعامل، د بنسټيزو او پراختیايي چارو تر سره کول، د نشهيي توکو او فساد پای ته رسېدل او د سرتاسري امنیت تامينېدل ورته، د منلو نه دي.:«په افغانستان کې د اسلامي امارت له فتحې سره سم، ډېر مثبت بدلونونه راغلي او افغانستان یې د باثباته مسیر په لور روان کړی دی.»
د ریاست الوزراء سیاسي مرستیال یو ځل بیا له هېوادونو څخه غوښتنه وکړه چې په اجباري ډول دې د افغان کډوالو له ایستلو ډډه وکړي او په دې برخه کې دې د نړیوالو قوانینو په نظر کې نیولو سره له پوره حوصله مندۍ کار واخلي.