دریمه برخه
د دې یادښت په لومړيو دوو برخو کې مو د نوموړي شبهاتو او ادعاوو ته ځواب ووايه او اوس د هغه د ليکنې وروستۍ برخې ته راځو، چې ظاهرا خیر غوښتونکی شوی دی او د هېواد او خلکو خير او صلاح غواړي او د فراريانو او اسلامي نظام مخالفانو سره د اتحاد او توافق له لارې د سولې او ثبات غوښتونکی دی.
نوموړی د خپلې لیکنې په وروستۍ برخه کې د یوه خیرغوښتونکي شخص په جامو کې ښکاري او داسې زړه سوځونکی نصیحت کوي: «په هر حال او له دې ټولو سره سره زه طالبانو ته یو وړاندیز کوم چې د دوی، ملت او هېواد خیر په کې نغښتی دی او که په ځان یې زړه سوځي او له وطن سره څه خواخوږي ولري، باید د هیواد ستونزې سمدستي له مخالفینو سره د مستقیمو خبرو اترو او تفاهم له لارې او د خلکو رایو ته په مراجعې سره حل کړي، او هیواد او ملت له شته ستونزو او د لارې په سر جنجالونو څخه وژغورل شي.
او که د دې په غیر کې د ستونزې حل له بلې خوا راغی (چې راتلونکی دی) نو په دې صورت کې به دوی په افغانستان کې د پښو ایښودلو ځای ونه لري او هېواد به له نورو تکراري بحرانونو سره مخ شي او ګران اسلام ته به یوه بله خطرناکه ضربه ورسېږي چې د دنیا او آخرت مسؤلیت به د دوی پر غاړه وي. و ما علینا الا البلاغ.» (منقول)
نوموړي هڅه کړې چې د دین له ادرسه داخل شي او د ګران اسلام له نوم څخه په استفادې د افغاني ټولنې خواخوږو واکمنانو ته بلنه ورکړي چې له هغو کسانو سره یو ځای شي چې یو وخت د ظالمانو لاسپوڅي او په مخالف سنګر کې وو.
هغه فکر کوي لکه څنګه چې يې له خپل ټول ملي او ديني عزت او کرامت څخه شا اړولې ده، د ده په څېر نور هم د پاکو شرابو جام د خړو اوبو څخه را اخلي او څکي یې او د مادي لذتونو په مستۍ کې د خپل خدای او ملت سره عهد او تړون ته شا اړوي.
نوموړی او نور په بهر کې ناست بغاوتګران او په وطن کې پاتې پټ دسیسه جوړونکي فکر کوي چې اسلامي امارت به د دوی د زمانې په څېر ژر پای ته ورسېږي او دایمي زوال به یې راشي؛ هغه اند او خام تصور چې د واقعیت څخه لېري توب نه بغیر نور هیڅ نه دي.
دی د اسلام ته د ضربې رسېدلو خبره کوي، خو دا يې هېره کړه، چې د جهاد پر مهال يې په سنګرونو او جګړو کې د همدغه خلکو سره یو ځای خپله وينه تويه کړه او شهیدان يې ورکړل، خو نن يې له هغه ټولو ديني او اسلامي وياړونو خپل لاسونه مينځلي او د کفر لمن یې ځان ته غوره ګڼلې او د دنیا په زګژوند راضي شوی دی.
د هغه چا چې په دنیا کې الله تعالی د هغه په تندي کې خیانت او شرم ښکاره کړ او د هغه له وجوده یې ټول د اسلامیت وزرونه او بڼکې وشکولې او د اسلام زینت یې ورته له تنه و ایست، اوس د اسلام او دین په فکر کې شوی او د دې ناخوښ پای په اړه اندیښمن دی.
دا ډول بد پايله کس اوس راغلی او د مؤمنانو، پرهېزګارانو او پر خپل عهد پاتې کسانو ته د اسلامیت نسخې جوړوي او هغوى ته بلنه ورکوي چې له خاينينو او وطن پلورونکو سره جوړه وکړي.
د ده په ځواب کې باید ووایو چې الله تعالی همیشه د خپل دین ملاتړ (نصرت) کوي او تر خپل ملاتړ لاندې یې ساتي او د دنیا تر اخره پورې به همداسې وي.موږ هغه څوک یو چې د اسلام دین تر چتر او بیرغ لاندې اوسېدولو ته محتاج یو او زموږ د پایلې ښه توب ور پورې تړلی ده.
پای
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.