د پښتونخوا له شمالي وزيرستان څخه د هندوکش غږ سرچينې وايي چې د شمالي وزیرستان ولايت په میرعلي ولسوالۍ کې د ياد ولايت لپاره د پاکستاني طالبانو مسؤلينو کلنۍ مشورتي غونډه ترسره کړې، او د غورځنګ د پاليسۍ په تطبيق، د خپل مشر په اطاعت، د نظرياتو تبادلې او د ډلګۍ په اقتصادي او نظامي پرمختګونو یې مهم بحثونه او پرېکړې ترسره کړې دي.
د سرچينې په خبره ياده مشورتي ناسته د شمالي وزيرستان لپاره د پاکستاني طالبانو د مسؤل حيدر په مشرۍ ترسره شوې او د پاکستاني حکومت له لوري د طالبانو د غړو کورونو ړنګولو او ځورولو په غبرګون کې د پاکستاني حکومت په امنیتي ادارو کې د کارکوونکو د کورونو نړولو په اړه هم د چټکو ګامونو اخيستلو بحث شوی دی.
سرچينه زياتوي چې په ياده غونډه کې د شمالي وزيرستان لپاره د پاکستاني طالبانو د دعوت او ارشاد مسؤل مولانا ابرار وزير ګډونوالو ته په يووالي او تقوا اختيارولو ټينګار کړی او د دې ترڅنګ یې نظامي او جګړه ييز تکتيکونه زده کول هم مهم ګڼلي دي.
په ياده غونډه کې همدا راز د دعوت او ارشاد مسؤلينو پاکستاني پوځيانو او امنيتي کارکوونکو ته د دندو پرېښودو او له پاکستاني طالبانو سره د یوځای کېدو په اړه خپلو ملګرو ته اړينې سپارښتنې کړې دي.