د افغانستان اسلامي امارت د بهرنیو چارو وزارت سیاسي مرستیال شېر محمد عباس ستانکزي د اقلیمي بدلون په ملي کنفرانس کې د وینا پر مهال ویلي: « افغانستان د چاپېریال ساتنې له اړخه ډیر ځپل شوی خصوصاً په تېره نیمه پېړۍ کې د شوروي اتحاد، امریکا او ناټو لخوا د جګړو په لړ کې د ډول ډول ممنوعه کیمیاوي بمونو، اسلحو کارول او حتی د بمونو مور کارولو په پایله کې د ډیرو بشري ناخوالو سربېره د دې هېواد ۸۰سلنه ځنګلونه له منځه لاړل.»
ښاغلي ستانکزي پر نړیوالو غږ کړی، چې د چاپېریال ساتنې او اقلیمي بدلون په برخه کې د افغانستان لاسنیوی وکړي.
ښاغلي ستانکزي ټینګار کړی چې چاپېریالي موضوعات باید سیاسي نه شي، دا بشري ناورین دی او نړیوال باید خپل مسؤلیت درک کړي او د چاپېریال ساتنې په برخه کې کوټلي اقدامات ترسره کړي.
د بهرنیو چارو وزارت سیاسي مرستیال ویلي، د اوبو کمښت په افغانستان کې یوه لویه ننګونه ده، نوموړي هممهاله له امارتي ادارو غوښتي چې د اوبو په مهارولو کې کوټلي ګامونه واخلي.