د صنعت او سوداګرۍ وزارت وایي، د دغه وزارت سرپرست نورالدین عزیزي په کابل کې د چین له سفیر ژاوشینګ سره په کتنه کې له افغانستان څخه چین ته د جلغوزو، انارو او قېمتي ډبرو سربېره د نورو صادراتو پر زیاتوالي خبرې کړي.
یاد وزارت د دې خبرو موخه د ترانسپورټي لګښتونو کمېدل، په مستقیمه توګه چین ته د افغانستان د صادراتو زیاتېدل، د سوداګریزو توکو لېږد را لېږد او هېواد ته د اړینو ماشین الاتو را واردول ښودلي دي.
د یاد وزارت په وینا، دې کتنه کې دواړو لوریو د همکارۍ زیاتوالي، د سوداګریزو اړیکو د پراختیا او د سوداګرۍ برخه د اسانتیاوو رامنځته کېدو په موخه دیوه ګډ ټیم په جوړېدو هم هوکړه کړې ده.