په ملګرو ملتونو کې د سعودي عربستان دایمي استازي عبدالعزیز الواصل د دې سازمان عمومي مجمعې ته په وینا کې ویلي، چې هېواد یې د افغانستان د سولې او ثبات پیاوړی ملاتړی دی او له نړۍ غواړي چې د افغانستان د ځمکنۍ بشپړتیا او حاکمیت درناوی وکړي.
نوموړي د خبرو پر دوام د افغانستان د خلکو بشري او اقتصادي ستونزې د اندېښنې وړ بللي او له نړیوالې ټولنې یې غوښتي چې د افغانانو د اساسي ملاتړ او عاجلو مرستو لپاره خپلې هڅې زیاتې کړي.
د سعودي دولتي خبري آژانس (SPA) د الواصل له قوله زیاته کړې، چې ریاض د «ملک سلمان د بشري مرستو او خیریه مرکز» له لارې په افغانستان کې د خوراکي توکو، روغتیا، تعلیم، څښاک او حفظالصحې او عاجلو مرستو په برخو کې ګڼې بشري پروژې پلي کړي دي.
د یادونې ده، چې وړمه ورځ په ملګرو ملتونو کې د چین استازي هم نړیوالې ټولنې ته د افغانستان پر ادغام ټینګار کړی و او د افغانستان اوسنی اقتصادي وضعیت یې مخ پر ودې بللی و.