عدلیې وزارت: په کابل کې یې د ۱۱ خیریه بنسټونو، اتحادیو او شوراگانو ناقونه فعالیتونه درولي

د عدلیې وزارت وايي، د تېرو دوو میاشتو په اوږدو کې یې د کابل ښار په بېلابېلو ناحیو کې د خیریه بنسټونو او اتحادیو فعالیت څېړلی، چې د ۱۱ خیریه بنسټونو، اتحادیو او شوراگانو دفترونه یې بند کړي دي.
له یاد وزارت څخه په خپره شوې خبرپاڼه کې ویل شوي، د عدلیې وزارت د جمعیتونو او ټولنیزو چارو ریاست د څارنې پلاوي په دغه موده کې د ناوړه گټې اخیستنې د مخنیوي په موخه ۳۲ اتحادیې او خیریه بنسټونه تر څارنې لاندې ونیول، چې د فعالیت د نه لرلو او د جواز د مودې پای ته رسېدو په دلیل یې د ۲ اتحادیو او ۸ خیریه بنسټونو او د یوې شورا فعالیت بند کړی دی.
د خبرپاڼې له مخې، د څارنې پلاوي د خیریه بنسټونو او اتحادیو د اروزنې په ترڅ کې هغو مسوولینو ته چې د اسلامي امارت د اصولو او پالیسۍ ته د پابندۍ، عدلیې وزارت ته د خپلو فعالیتونو د راپور ورکولو، په وخت د جواز د تمدیدولو او نورو چارو په اړه توصیې وکړي او له هغوی څخه یې ژمنه واخیسته، چې ناقانونه کړنې به نه کوي.
اوسمهال په هېواد کې گڼ خیریه بنسټونه، اتحادیې او شورا گانې فعاله دي، چې د عدلیې وزارت د مسوولینو په خبره، کارونه یې تر اروزنې لاندې دي او خپلسرۍ ته به یې پرې نه ږدي.