لیکوال: محمد فیصل
تېره اوونۍ د پاکستان لوړ پوړو سیاسي او نظامي مشرانو د عزم استحکام په نوم نوي پوځي عملیات منظور کړل؛ سره له دې چې د دغو عملیاتو بشپړ جزیات په ډاګه شوي نه دي، خو ګومان دا دی چې دغه عملیات په پښتونخوا او مخکینیو قبایلي سیمو کې کېږي.
په وروستیو څو کلونو کې په پاکستان کې امنیتي وضعیت ډېر خراب شوی دی او په تېر میلادي کال کې اووه سوه امنیتي پیښو کې تقریباً زر تنه وژل شوي چې زیاتره یې امنیتي کسان دي.
د دې تر څنګ په پاکستان کې په دنده بوختو چینایانو هم بریدونه شوي چې خونړۍ برید یې درې میاشتې وړاندې په بشام کې وو؛ په هغه برید کې د داسو ډیم کې بوخت پینځه چینایي انجینران ووژل شول.
تر اوسه د برید مسوولیت هېڅ چا منلی نه دی، خو پاکستان ویلي وو چې برید په افغانستان کې پلان شوی وو؛ خو افغانستان د پاکستان ادعا بې بنسټه او له حقایقو لرې بللې وه.
له هغه وخت راهیسې ډیری چینایي پانګوال په پاکستان کې پانګونې ته زړه نه ښه کوي؛ څو ورځې وړاندې په اسلام اباد کې یو چینایي چارواکي ویلي وو چې چینایي پانګوال په پاکستان کې پانګونې ته لیوالتیا نه ښیې.
اوس پاکستان پلان لري چې د عزم استحکام په نوم عملیاتو له لارې چین خوشاله کړي؛ ویل کېږي چې پاکستان د چین د فشار له امله دغه عملیات پیلوي.
چین په پاکستان کې د سي پیک ۶۲ میلیارد ډالري پروژه کې بوخت دی او ویل کېږي د خراب امنیتي وضعیت له امله دغه پروژه او د چین نوره پانګونه له ګواښ سره مخ ده.
د پاکستان امنیتي ځواکونه چې په امنیت راوستلو او ساتلو کې په ځلونو ناکام شوي، اوس غواړي د عزم استحکام په نوم چینایانو او نورې نړۍ ته دوکه ورکړي، پاکستان د جګړې قرباني وښیي، پیسې او د نړۍ خواخوږي ترلاسه کړي، له کرښې اخوا پښتانه ووژني او ګوته افغانستان ته ونیسي.
د پاکستان پوځ په تیرو شلو کلونو کې څو ځلې عملیات کړي، خو پایله یې یوازې ناکامي او د پښتنو د کورونو ورانول او کډوال کول وو.
دغه راز، پاکستان د دې عملیاتو له لارې غواړي چې له افغانستان سره اړیکې خرابې کړي او په ډیورنډ کرښه دواړو لورو ته د میشتو پښتنو ژوند تریخ او کاروبارونه یې هم ور خراب کړي.
لکه د تېرو ناکامو عملیاتو په څېر به د دغو عملیاتو پایله هم ناکامي او د کوزنیو پښتنو بې کوره کېدل او له افغانستان سره د اړیکو خرابېدل وي چې زیان به یې بیا هم پاکستان ته رسېږي.
ښه خبره دا ده چې زیاتره پاکستاني سیاستوالو د دغو عملیاتو مخالفت کړی دی.
د پاکستان تحریک انصاف، جمعیت علمای اسلام او نورو ملتپالو ګوندونو دا عملیات غندلي دي؛ د تحریک انصاف یو مشر اسد قیصر پارلمان ته ویلي چې د دې عملیاتو موخه له افغانستان سره اړیکې خرابول او د پښتنو سوداګري له منځه وړل دي.
د پاکستاني طالبانو مسئله د پاکستان کورنۍ مسئله ده او د خبرو اترو له لارې هم حل کېدای شي، خو وروستیو خبرو او د پاکستان دریځونو وښوده چې دوی خپله دغه مسئله حل کول نه غواړي، په لوی لاس یې غټوي او نور اړخونه ورکوي.