دهاسوشېټېډ پرېس او سي اېن اېن خبري اژانسونو په جلا توګه د لوړ پوړو حکومتي چارواکو په حواله راپور ورکړی، چې اسرائیلو “د شپږ اونیز اوربند موافقه منلې ده.”اسوشېټېډ پرېس په خپل راپور کې د جوبایډن د ادارې د یوه لوړپوړي چارواکي له قوله ویلي، چې اسرائیلو په غزه کې د وړاندیز شوي اوربند او د یرغمل شویو بندیانو د خلاصون له چوکاټ سره موافقه کړې ده او اوس د حماس وار دی، چې ځواب ورکړي.
ټاکل شوې، چې د دې موافقې په اړه خبرې د یکشنبې په ورځ په مصر کې بیا پیل شي، تېره اونۍ رویټرز خبري اژانس راپور ورکړ، چې د امریکا، اسرائیلو، قطر او مصر له استازو سره په پاریس کې له څو ورځو خبرو اترو وروسته د موقت اوربند او د یو شمېر یرغمل شویو بندیانو د خلاصون له پاره پلان چمتو شوی دی.
رویټرز راپور ورکړی، چې دا وړاندیز حماس ته لېږل شوی، چې پر بنسټ به یې “څلوېښت ورځنی اوربند” رامنځته شي.
په غزه کې د قطر، مصر او امریکا په منځګړیتوب د اوربند د رامنځ ته کېدو په هیله له څو اونیو راهیسې خبرې اترې روانې دي.
د دغه راپور له مخې، دواړه لوري به هر ډول دښمني ودروي، پر غزې د اسرائیلو جاسوسي الوتنې به د اتو ورځو له پاره ودرول شي، شاوخوا ۴۰ تنه یرغمل شوې ښځې، ناروغان، چې عمرونه یې له ۱۹ کم او تر ۵۰ ډېر ښودل شوي، د ۴۰۰ فلسطیني بندیانو د خلاصون په بدل کې خوشي کیږي.
له دې مرحلې وروسته باید اوسېدونکو ته اجازه ورکړل شي، چې په تدریجي ډول شمالي غزې ته ستانه شي او اسرائیلي ځواکونه باید له ګڼ مېشتو سیمو څخه ووځي.
اسوشټېد پرس خبري آژانس لیکلي دي، چې تمه ده حماس به د یکشنبې په ورځ په قاهره کې د خبرو له بیا پیلېدو وروسته خپل غبرګون اعلان کړي.
یوه امریکایي چارواکي CNN ته وویل، چې اسرائیلو دا تړون په اصولو کې منلی او د نور دوامداره اوربند د طرح کولو دویم پړاو به د شپږ اونیو اوربند په جریان کې ترسره شي”دوه ورځې وروسته له هغې، چې په غزه کې د وړیا خوراکي توکو د وېش په ترڅ کې تر سلو زیات کسان ووژل شول، امریکا دغې سیمې ته د خوراکي موادو د مرستو لومړۍ هوايي جوپه استولې ده.
د امریکا متحدو ایالتونو د درېیو پوځي الوتکو په مرسته د هوا له لارې غزې ته د څه باندې ۳۰ زره خوراکي بستو په ګډون لومړنۍ مرستې رسولې.
حماس چې په غزه کې واکمني کوي، پر اسرائیل په ملکي وګړو د ډزو تور پورې کړی، په غزه کې د ملګرو ملتونو د بشري چارو د همغږۍ د دفتر مشر جیورجیوس پیتروپولوس ویلي، چې دی او پلاوی یې د پنجشنبې په ورځ له پېښې وروسته روغتون ته تللي او هلته یې ډېر خلک لېدلي، چې د ګولیو په واسطه ټپیان شوي دي.
بل لور ته اسرائيلو ويلي، چې ډېری يې وروسته له هغه په ډزو وژل شوي، چې وايي ځواکونو یې د خبرداري ډزې پرې وکړې.اسرائیلو منلې ده، چې عسکرو یې په سلګونو فلسطینیانو “د امنیتي اندېښنو له کبله” د غزې په شمال کې د مرستو د یوه کاروان په شاوخوا کې راټول شوي وو، ډزې وکړې.