د پرځیدلي جمهوریت د چارو ادارې رئیس فضل محمود فضلي د افغانستان په تړاو د ویانا په پنځمه ناسته کې پر ګډون کوونکو پخوانیو سیاسیونو توندې نیوکې کړي او ویلي یې دي، چې دا د دوی هماغه پخوانی عادت دی چې په هر قیمت او هرې ممکنې لارې لنډمهاله ایتلافونه جوړوي، څو یا واک ته ورسېږي او یا هم په واک کې شریکان شي.
د نوموړي په وینا؛ «که د پخواني جهاد، سکتاریستي او انجویي حلقاتو اړوند څېرې د ویانا په څېر کنفرانسونو ته خوښي ښکاره کوي، دا د دوی هماغه پخوانی عادت دی؛ په هر قیمت او هرې ممکنې لارې لنډمهاله ایتلافونه جوړوي، څو یا واک ته ورسیږي او یا په واک کې شریکان شي.» هغه وایي، دوی ته دیموکراتیک او ملي ارزښتونه یوازې شعارونه دي، نه عملي تعهد.
د فضلي په وینا، د ویانا ناستې ځینو ګډونوالو د جمهوريت تر پرځیدلو وروسته ټينګار کاوه، چې باید پر بهرنيانو تکیه ونه شي، خو بیا هم د امریکا او د هغوی د متحدینو په مالي ملاتړ جوړو شویو غونډو کې ګډون کوي.
نوموړی وایي: «هغه کسان چې ځانونه سیاسي تیوریسنان او کیڼ اړخي روشنفکران بولي او د تیر جمهوریت له سقوط وروسته یې اعتراف وکړ، چې د امریکا تر فشار او مرستې لاندې د «بن پروسه» یوه ناکامه تجربه وه او نور باید د بهرنیانو دروازې ونه ټکول شي. متاسفانه دوی د خپلو ويناوو او اعترافاتو باوجود بیا-بیا د امریکا او د هغې د متحدینو په مالي ملاتړ جوړو شوو اجنډاوو، کنفرانسونو او پروسو کې په ویاړ سره برخه اخلي او په لومړي صف کې کېني.»