الجزيرې خبري شبکې د سوریې دولت د ولسمشرۍ دفتر د اعلان له مخې راپور ورکړی، چې ولسمشر احمد الشرع (ابو محمد الجولاني) د قطر له امیر، د ترکیې له ولسمشر او د سعودي له ولیعهد سره په درې اړخيزه ټیلیفوني خبرو کې، د سوریې د وروستیو تحولاتو او په دغه هېواد د صهیونیستي رژيم د تېري په اړه سلا مشورې او خبرې کړې دي.
د یاد دفتر د بیان له مخې، د قطر امیر، د ترکیې ولسمشر او د سعودي عربستان ولیعهد احمد الشرع ته له سوریې څخه په یووالي سره خپل ملاتړ څرګند کړی او په دغه هېواد له هر ډول بهرنۍ مداخلې سره یې مخالفت کړی دی. همداراز احمد الشرع هم د سوریې د دولت له لوري د ټولو سوري ولسونو له ملاتړ څخه ډاډ ورکړی دی.
شیخ تمیم بن حمد آل ثاني، رجب طیب اردوغان او محمد بن سلمان ټینګار کړی، چې دوی د سوریې د ملي یووالي، ځمکنۍ بشپړتیا او دا چې د سوریې دولت باید د ټول هېواد پر خاوره بشپړ کنټرول ولري، ملاتړ کوي.
په ورته مهال احمدالشرع سوريه کې وروستي تحولات د بهرنيو د مداخلې او غير قانوني وسلو د شتون له امله بللي او قانون ماتوونکو ته د سختې سزا په ورکولو یې ټينګار کړی.
