امریکایي رسنۍ لانګ وار جورنال په یو مطلب کې متحده عربي اماراتو او سعودي عربستان ته د افغانستان د کورنیو چارو د سرپرست وزیر د سفر په اړه یو مطلب خپور کړی.
د مطلب لیکوال “ویل سیلبر” وایي، د روانې جون میاشتې په پنځمه که له یوې خوا نړۍ په غزه کې د اسرایلو او حماس جګړې ته متوجه وه، خو بل لور ته سرپرست وزیر خلیفه سراج الدین حقاني خپل لومړنی بهرنی سفر درلود.
لیکوال چې په افغانستان کې یې هم د امریکا لپاره خدمت کړی او څو کلونه یې تېر کړي، وایي: سراج الدین حقاني نړۍوال مشروعیت ترلاسه کړ.
په دغه سفر کې له سراج الدین حقاني سره د هغه ورور انس حقاني او د استخباراتو مشر عبدالحق وثیق هم ملګري وو.
لیکوال وایي: سره له دې چې سراج الدین حقاني زرګونه امریکایان وژلي، خو له هغه سره د یو سیاستوال په توګه چلند وشو.
د اماراتو ولسمشر شیخ محمد زاید بن النهیان سراج الدین حقاني او مل پلاوي ته یې ګرم ښه راغلاست ووایه او دواړو لورو په دوه اړخیزه همکاریو او ګډو ګټو خبرې وکړې.
سراج الدین حقاني له اماراتو وروسته سعودي ته د حج لپاره لاړ؛ دا وروسته له هغه چې د ملګرو ملتونو امنیت شورا له هغه څخه د سفر بندیز لرې کړ.
نوموړی امریکایانو ته مطلوب او پر سر یې لس میلیونه ډالر نغدي جایزه هم اعلان شوې ده.
لیکوال وایي: سراج الدین حقاني داسې مهال اماراتو او سعودي ته سفرونه کوي چې دواړو هیوادونو کې اته زره امریکایي عسکر میشت دي.
لیکوال وایي: داسې ښکاري چې امریکایان د طالبانو د رسمیت پیژندنې په لور روان دي.