د احصایې او معلوماتو ملي اداره وايي، پرو سږکال ۱۴۰۲ل کال کې په ټولیز ډول په لغمان کې ۷۵زره او ۸۳۴ کسانو ته پېژندپاڼې وېشل شوې دي، چې ۳۴زره او ۳۸۴ برېښنايي او ۴۱زره او ۴۵۰ نورې یې کاغذي پېژندپاڼې دي.
د لغمان د احصایې او معلوماتو ادارې رئیس عبدالحی حقاني وايي، په لغمان کې هره ورځ شاوخوا ۵۰۰ کسان د برېښنايي او کاغذي پېژندپاڼو اړوند چوپړتیاوو د تر لاسه کولو په موخه د دې ریاست اړوند دفترونو ته مراجعه کوي.: « د مرکز په گډون د دې ولايت په ټولو ولسواليو کې د دوی اړوند دفترونه فعال دي او پروسږ کال د يادو دفترونو له لارې توانېدلي دي چې ۱۶۴۴ کسانو ته په کاغذي پېژندپاڼو کې د اصلاحاتو او ۱۹ زره او ۳۹۱ نورو کسانو ته د ژوند پېښو اړوند خدمتونه وړاندې کړي.»
د حقاني په خبره، په لغمان کې د برېښنايي پېژندپاڼو د وېش دوې څانگې فعالې دي، چې دواړه څانگې یې د مرکز مهترلام ښار کې دي او تر اوسه په ولسوالیو کې یاده اسانتیا نه لري.
که څه هم له برېښنايي پېژندپاڼو د حکومت خزانې ته هره اوونۍ مېلیونونه افغانۍ عواید راځي؛ خو تر اوسه یاده پروسه ډېره ورو روانه ده، چې غټ لامل یې د برېښنايي پېژندپاڼو د وېش کمې څانگې دي.