د بهرنیو چارو وزارت وايي، په قاهره کې د سرپرست حکومت د سفارت په هلو ځلو د مصر او یو شمېر نورو افریقايي هېوادونو له زندانونو ۱۷ افغانان ازاد او خپل هېواد ته راولېږدول شول.
د بهرنيو چارو وزارت د ویاند مرستیال حافظ ضیاءاحمد تکل نن ویلي، دغه کسان په مصر او یو شمېر افریقايي هېوادونو مراکش، لیبیا، سوډان او موریتانیا کې د بېلابېلو دلایلو پر اساس بندیان وو، چې په خبره یې، په قاهره کې د اسلامي امارت د سفارت په هلو ځلو له بنده خوشې او خپل هېواد ته راولېږدول شول.
په خبرپاڼه کې راغلي «د مصر په پلازمېنه قاهره کې د ا.ا د لوی سفارت په هڅو په تېرو درې میاشتو کې، د مصر په ګډون له یو شمېر افریقایي هېوادونو، لکه مراکش، لیبیا، سوډان او موریتانیا څخه، ۱۷ افغانان چې د بېلابېلو دلایلو له امله بندیان وو، له بند څخه آزاد او د آریانا افغان هوایي شرکت له لارې هېواد ته راولېږدول شول».
سرچیني ویلي، د بندیانو د خوشې کولو دغه پروسه په قاهره کې د افغانستان سفارت او د یادو هېوادونو په همغږۍ ترسره شوې او په راتلونکي کې به هم د خپلو اتباعو د ساتنې او د هغوی د حقونو د خوندي کولو لپاره خپلې هلې ځلې جاري وساتي.