نهمه برخه
له هغو کسانو سره مرکې چې د باغیانو له خوا، له ځاني، مالي، حیثتي او نورو زیانونو سره مخ شوي دي
هر انسان په خپله سینه کې د ناویل شویو خبرو یوه پټه خزانه او د ژوند ډيرې پټې پېښې لري چې په خپل زړه کې یې بندې کړې دي، ډیر په سختۍ داسې پيښيږي چې خپله د زړه غوټه نورو ته نه پرانیزي او دغه پېښې له نورو سره شریکې او خپل رازونه ښکاره کړي، تر څو په ویلو یې زړه سپک او ځان لږه آرام کړي.
د انسان په ژوند کې ډيرې ښې او بدې، خوږې او ترخې حادثې پېښيږي چې ځینې یې په ژوند کې د ژور بدلون او تحول سبب کېږي، ځینې یې د درد او غم لامل ګرځي چې اغېز یې د تل لپاره د انسان په روان کې تکراریږي او یاد یې هره شېبه تازه کېږي.
کله کله یو انسان په خپله د داسې پېښو لامل کېږي چې په پایله کې یې ورته ناوړه پېښې را منځ ته کېږي او کله، کله د غلطو پرېکړو پایلې زیان ورته رسوي او د تباهۍ کندې ته یې ورټېل وهي.
خو همېشه داسې نه وي، ځینې وختونه خارجي عوامل د انسان لاس او پښې ور تړي او تر اغېز لاندې یې راځي، بیا نشي کولای له پامه یې وغورځوي یا ځان ترې وژغوري، بلکې دا سخت حالت باید وزغمي، ستونزې وګالي او د وحشت له کوڅو تېر شي.
کله انسان له داسې حالت سره مخ شي، پرته له دې چې تسلیم شي او یا زغم وکړي بل هیڅ لاره نه ورپاتې کېږي. یواځې الله تعالی ته فریاد کول او د زړه دروند بار په خپل زړه کې ساتل دی چې لږ تر لږه هغه ته یو ډول تسکین او آرام ورکوي او دردونه یې ارامولی شي.
په ځانګړې توګه په جګړو ځپلو، کړاو لیدلو او اشغال شویو هیوادونو کې دا ډول دردونه او غمونه ډیر پېښیږي، هیچا ته د بل انسان درد او غم نه ښکاري؛ هیڅوک یې پوښتنه نه کوي او نه یې د زړه درد یا رواني کړاو ته ارزښت ورکوي.
افغانستان هم د همدې ډول ناوړه پېښو او ناخوالو لپاره یوه پراخ بستر دی چې په اوږد مهاله او دوامداره توګه يې د ملت روحیه ماته کړې او له داخلي تخریب سره یې مخ کړي دي.
همدا باغیان وو چې د افغانانو زړونه یې سخت دردولي، پر بدن یي داسې ټپونه ور جوړ کړي چې په ارامه او خاموشه یې زغمل د چا د وس خبره نه ده.
دا خلک تر اوسه هم کله چې د باغیانو خبرې اوري او یا یې ویني، دردونه یې تازه کېږي او په تېر کې لیدلي کړاوونه یې وریادیږي.
هر څومره چې پر دې ډول پروګرامونو کار وشي او له ډيرو خلکو سره مرکې وشي، په هماغه اندازه به خلک او ملت د باغیانو له بدیو او فسادونو څخه خبر شي، په دې به وپوهیږي چې باغیانو د ملت پر اوږو څومره دروند بار اچولی و، څومره یې دردولی او څومره یې زیانمن کړی و.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.