څه موده وړاندې هندوکشغږ د خپلو سرچينو له لارې د بهر مېشتو فراري سياسيونو د مجازي، يا تش په نوم ملي مقاومت شوری د رهبرۍ غړي عطا محمد نور هغه صوتي کليپونه نشر کړل، چې په ښکاره ډول يې د تيرې ادارې د ارګ معاون او له احمد مسعود څخه د بېلېدونکې نوې جبهې مشر امرالله صالح تر لفظي بريد لاندې راوستی و او سخت تمسخر يې ورباندې کړی و؛ دلته يې کتلی شئ:(https://x.com/Hindukush_0/status/1865388458803442165?t=O2eJ25JQMZanRMbJoNNcmA&s=19).
که څه هم د امرالله صالح او مقاومت جبهې د مشر احمد مسعود په وړاندې د عطامحمد نور د تېزو او تمسخر آمېزه نيوکو دا لومړی ځل نه ؤ، خو دا ځل د امرالله صالح او احمد مسعود د پلويانو لخوا په ټولنيزو رسنيو کې په پراخه توګه و رټل شو او هغه يې د يو خائن په توګه معرفي کړ.
تازه يو ځل بيا د ملي مقاومت په نوم د مجازي شوری د بهرنيو اړيکو د کميټې مسؤل ډاکتر عزيز بارز چې په لندن ښار کې مېشت دی؛ د امرالله صالح په اړه له کينې او تمسخر ډکې څرګندونې کړې دي. ډاکتر عزيز بارز پر خپله رسمي صفحه د نجيب ننګيال پر هغه پرانيستي ليک تبصره کړې، کوم چې امريکا ته يې د امرالله صالح د سفر په اړه پر خپله ايکس پاڼه خپور کړی و.
بارز لیکلي: د ۲۰۲۱م کال په اګست مياشت کې چې کله جمهوريت سقوط وکړ، نو د جمهوري رياست لومړي معاونيت او دې ته ورته نور سمتونه هم له عملياتي او حقوقي اړخه لغوه دي او امرالله صالح بايد په هېڅ صورت کې ځان د جمهوري رياست د لومړي معاون يا د پرځېدلي حکومت د استازي په توګه معرفي نه کړي.
نوموړي د امرالله صالح خرابې سياسي سابقې ته په اشارې لیکلي، چې د امرالله صالح سياسي او ملي استقلال د اعتماد وړ نه دی او له دې بايد سترګې پټي نه شي. همدارنګه نوموړی په خپله تبصره کې نجيب ننګيال يو چاپلوس بولي او د چاپلوسۍ لپاره امرالله صالح ته د جمهوري رياست لومړی معاون وايي؛ بارز زیاته کړې، چې د امرالله کارنامې د دې هر څه خلاف دي او د جمهوريت په سقوط کې دوهم ستر نقش لرونکی شخص دی چې نه يې تر اوسه له خلکو څخه بښنه غوښتې او نه يې په دې اړه څرګندونه کړې ده.
پوښتنه دا ده چې ولې مقاومت شوری له مختلفو ادرسونو او اسلوبونو څخه په استفادې کله د عطامحمد نور او عبدالرشيد دوستم په توسط مقاومت جبهه تر خپل لفظي بمبارد لاندې راولي، کله هم د عزيز بارز او عطا محمد نور په توسط امرالله صالح نقدوي او تمسخر پرې کوي، کله د يونس قانوني او اسماعيل خان په توسط حنیف اتمر ښکنځي، شيطان يې بولي او د انګلستان جاسوس ورته وايي، کله د محقق او دوستم په توسط سميع سادات او متحده جبهه رټي او کله نور سياسي جريانونه او شخصيتونه؟
مقاومت شوری د نورو احزابو او جريانونو په اړه کوم سیاست او موخې لري؟
ځواب يې واضح دی او هغه دا چې مقاومت شوری د افغانستان د سرنوشت په اړه له هر خارجي اړخ او استخباراتي سازمان سره د معاملې د اصلي محوريت حق ځان ته ورکوي او بل هيڅوک، حتی احمد مسعود هم د دې مستحق نه بولي چې د دوی له کنټرول وتلي فعاليتونه، ليدنې او تحرکات ترسره کړي، ځکه دوی ترې په وېره کې دي چې داسې نه په رشد او مخته تګ سره يې د دوی په وړاندې د بهرنیو هېوادونو لږ پاته توجه هم له منځه لاړه شي او په راتلونکي کې پېرودونکي له لاسه ورکړي، همدا لامل و چې مقاومت شوری د احمد مسعود د کنټرول لپاره په ځانګړي هدف، د نورو جريانونو د ورسره يو ځای کولو او تر اغېز لاندې راوستلو لپاره په عمومي هدف د ملي مجمع په نوم نوی ائتلاف رامنځ ته کړ، خو له هماغه پيل څخه يې پايې سستې شوې او د رحمت الله نبيل له بيرته پرېکون او د موجوديت په اعلان کې د احمد مسعود او د هغه د ټيم له جلا والي سره مخ شو.