د ۲۰۲۱م کال د اګست پر ۱۵مه د جمهوریت له پرځېدو سره سم امرالله صالح پنجشېر درې ته ولاړ او له احمد مسعود سره یو ځای یې د طالبانو خلاف د مقاومت جبهې په نوم د وسله والې ډلې د جوړولو اعلان وکړ، خو له لږ مقاومت وروسته یې ماتې وخوړه او طالبانو پنجشېر ترې ونیو.
هغه مهال د طالبانو یو شمېر مخالفینو دغه جبهه تورنه کړې وه، چې د طالبانو مخالفت تر یوه قوم او د پنجشېر په نوم یوې ځانګړې درې پورې محدود ساتل غواړي؛ همدې کار یې د طالبانو د ټولو مخالفینو د انسجام پر وړاندې خنډ او ځنډ رامنځته کړی دی او نشي کولای تر واحد نوم او دریځ لاندې یې ور ټول کړي.
د پرځېدلي جمهوريت لومړی مرستیال امرالله صالح چې یو مغرور، متکبر او خود خواه انسان و، اوس نه غواړي د یو سیاسي ماشوم تر لاس لاندې کار وکړي او د هغه د امر تابع واوسي؛ په همدې تکل یې له مقاومت جبهې څخه لار جلا کړه، ځکه چې د یادې جبهې مسؤلیت د احمد شاه مسعود د زوی احمد مسعود پر غاړه دی.
صالح په جاسوسي فعالیتونو کې هم اوږده مخینه لري، وخت به دا ثابته کړي چې څومره د بهرنیو استخباراتي سازمانونو باور خپلوي او له احمد مسعوده به مخته کېږي.
له مقاومت جبهې څخه د امرالله صالح جلا کېدل ښايي څو علتونه ولري؛ په دې وروستیو کې د طالبانو د مخالفو ډلو او خیالي جبهو ترمنځ خپل منځي اختلافات اوج ته رسېدلي دي، ځینې محرم رازونه یې افشاء شوي او افغان ولس ته یې اصلي څهرې څرګندې شوې دي، چې په لړ کې یې د مقاومت جبهې له منځه هم مهم رازونه افشاء شوي او د خپل منځي اختلاف له ډېرښت سره – سره ولس ته هم مخ توري شوي دي.
څه موده وړاندې امرالله صالح په تاجکستان هېواد کې د مقاومت جبهې له څو نورو ناراضه غړو لکه ظاهر اغبر، غلام بهاءالدین جیلاني او ایوب سالنګي سره غونډه کړې وه، له اوږدو بحثونو وروسته دې توافق ته ورسېدل، چې د امرالله صالح په مشرۍ نوې جبهه جوړه کړي.
دوی د مقاومت جبهې د مسؤل احمد مسعود د ټیم او د مسعود د کورنۍ جبهې له ځان غوښتنې، تکبر او شهرت پرستۍ ناراضه دي، یادو څو تنو چې د نوې جبهې د جوړېدو تابیا یې نیولې ده، پر احمد مسعو او ټیم یې دا نیوکه هم کوي چې له ځینو بهرنیو هېوادونو څخه مرستې راټولوي او تنها یې پر خپله نږدې کړۍ او محدودو کسانو وېشي.
امرالله د نوې جبهې د ایجاد لپاره سربازګیري پیل کړې ده او یو شمېر منفوري څهرې ور ټولوي. نوموړی د روند سبز/ زرغون بهیر په نوم یو استخباراتي او تبلیغاتي ادرس هم لري، دغه ادرس د نوموړي په مطرح کېدلو کې مهم رول اداء کړی دی؛ د پرځېدلي جمهوریت پر مهال د ولسي جرګې غړو په یوې عمومي غونډه کې ویلي و، چې زرغون بهیر یو استخباراتي سازمان دی او دغه سازمان د جوړېدو راهیسې د یوه هېواد له لوري تمویلېږي او ملاتړ یې کوي.
د یادې جرګې مشر میر رحمان رحماني هم ادعا کړې وه، چې اسناد او شواهد په لاس کې لري، چې روند سبز/ زرغون بهیر یوه بهرني هېواد پورې تړلی ادرس دی او دا یې یو پروژه ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.