د کډوالو او راستنېدونکو چارو وزارت وايي، نن او پرون له ایران څخه په خپله خوښه او جبري توگه تر ۲ زرو ډېر افغانان راستانه شوي دي.
له یاد وزارت څخه په خپره شوې خبرپاڼه کې ویل شوي، له ایران څخه دوه زره او ۷۷۴ افغانان راستانه د هرات د اسلامکلا له لارې خپل هېواد ته راستانه شوي دي.: «د هرات د اسلامکلا د سرحدي امر د معلوماتو له مخې، په دغو کسانو کې کورنۍ هم شاملې وې، چې ۵۱۳ تنه یې اړمن وپېژندل شول او د مرستو په موخه د کډوالو نړیوال سازمان دفتر ته ور وپېژندل شول او خوراکي او غیر خوراکي توکي یې تر لاسه کړل.»
د خبرپاڼې له مخې، دغه راز ۲۶ بېسرپرسته ماشومان د خپلو کورنیو د پېژندنې په موخه وارچایلډ موسسې ته ورپېژندل شول.
همدرانگه د تورخم له لارې هم تر ۹۰۰ ډېر افغانان په جبري توگه هېواد ته راستانه شوي دي.
د کډوالو وزارت د معلوماتو له مخې، په راستانه شوو کې ۱۲۵ کورنۍ چې ۷۱۱ تنه کېږي په جبري توگه له پاکستان څخه راستنې شوې دي او د مرستو په موخه یې د ملگرو ملتونو عالي کمېشنرۍ او د کډوالو نړیوال سازمان دفترونو ته ورپېژندلي دي.
د هرات د اسلام کلا، د ننگرهار د تورخم سربېره د کندهار د سپینبولدک له لارې هم ۲۰۰ تنه له پاکستان څخه په جبري توگه راستانه شوي دي.
د افغانستان او پاکستان د اړیکو د خرابېدو وروسته پاکستاني حکومت د افغان کډوالو ویستلو ته کار ویلی، چې له پرو سږکال راهیسې سلگونه زره کورنۍ راستنې شوې دي.