د مالیزیا د کورنیو، بهرنیو چارو او دفاع وزارت استازو د افغانستان د کورنیو چارو له چارسمبالي وزیر خلیفه سراجالدین حقاني سره لیدلي او په دوه اړخیزو همکاریو یې خبرې کړې دي.
له کورنیو چارو وزارت څخه په خپره شوې خبرپاڼه کې ویل شوي، په دغه لیدنه کې د افغانستان د کورنیو چارو وزیر مالیزیايي پلاوي ته وویل، افغانستان له ټولې نړۍ په ځانگړې توگه له اسلامي نړۍ سره ښې اړیکې غواړي.:«افغانان الحمدلله د خپلې ازادۍ او وطن خاوندان دي. دلته امن ټینگ دی، د افغانانو تر منځ وحدت اعاده شوی دی. موږ ټولې نړۍ سره، بالخصوص اسلامي نړۍ سره نږدې اړیکې او تعامل غواړو. مالیزیا یو پرمختللی اسلامي هېواد دی، موږ یې باید له هغو تجربو څخه چې زموږ جغرافیې او تاریخي موقعیت سره پخلا دي، گټه واخلو.»
د مالیزیا پلاوي د کورنیو چارو وزیر ته ژمنه ورکړې، چې هېواد یې د سایبري امنیت او ډیجیټلي جرمونو په برخه کې به د موجوده نظام سره خپلې تجربې شریکې کړي.
په خبرپاڼه کې ویل شوي، همدارنگه د دواړو هېوادونو د کورنيو چارو وزارتونو ترمنځ د نشهيي توکو پر وړاندې مبارزې، د پوليسو روزنې او د دواړو لورو ترمنځ د همکاريو او تجربو د تبادلې په باب هم خبرې شوې دي.
د مالیزیا یو لوړپوړی پلاوی کابل ته راغلی، چې په کابل کې یې له گڼو دولتي چارواکو سره لیدلي او د دواړو هېوادونو ترمنځ یې د اړیکو په پراختیا هم خبرې کړې دي.