د مالیې وزارت مسوولینو نن د حکومت د اطلاعاتو او رسنیو په مرکز کې د یوې خبرې ناستې پر مهال، د پمپ سټېشنونو د ثابتې او هوټلونو د انتفاعي مالیې په کچه کې د کمښت په اړه، خبر ورکړ.
د مالیې وزارت د عوایدو او گمرکونو مرستیال عبدالقاهر(حاجي ادریس) وايي، د حکومت د مشرتابه د فرمان پر بنسټ، د پمپ سټېشنونو د ثابتې او هوټلونو د انتفاعي مالیې په کچه کې د پام وړ کمښت راغلی دی.: «د افغانستان اسلامي امارت تل هڅه کوي، چې په اصولو کي اسانتیاوې رامنځته کړي، له خپل ولس سره په هره برخه کې اساني وکړي او کُلي پالېسي یې له ولس سره پر شفقت او مهربانۍ ولاړه ده.»
نوموړي وویل، وخت په وخت د مالیې ورکوونکو ستونزو ته رسېدنه شوې او د مالیاتو د تخفیف برخه کې د هغوی غوښتنو ته مثبت ځواب ویل شوی لکه د اصنافو له پاره مخکېنی معافیت، د یو نیم لک افغانیو څخه تر شل لکه افغانیو پورې لوړ شو او د مالیاتو اندازه یې له ۰،۵ څخه ۰،۳ سلنې ته را کمه شوه.
حاجي ادریس زیاته کړه، د مالیې وزارت د وړاندیز او د حکومت د مشرتابه د حکم پر بنسټ، د گاز او تېلو پمپ سټېشنونو د ثابتې او د رسټورانټونو د انتفاعي مالیې برخه کې د پام وړ کمښت رامنځته شوی دی. له دې مخکې ټول هغه هوټلونه او سیار رسټورانټونه، چې ربعوار فروشات یې له ۷۵۰۰۰۰ افغانیو څخه کم و، د ۲ سلنه او له دې زیاته اندازه یې د ۵ سلنه انتفاعي مالیې تابع وو؛ خو د نوي فرمان له مخې د یادو هوټلونو او رسټورانټونو د انتفاعي مالیې کچه ۲ سلنه ټاکل شوې ده. دغه راز د گاز او تېلو پمپ سټېشنونو له في لېتر څخه ۰.۶ افغانۍ ثابته مالیه اخیستل کېده؛ چې د نوي فرمان پر بنسټ دغه کچه ۰.۳ افغانیو ته راټیټه شوې ده.
په دې خبري ناسته کې د ریاست الوزراء اداري مرستیال عبدالسلام حنفي وویل، د مالیاتو برخه کې د اسانتیا رامنځته کولو په موخه، مخکې د شرکتونو مالي جریمې معاف شوې او د اصنافو له پاره مخکېنی معافیت، د یو نیم لک افغانیو څخه تر شل لکه افغانیو پورې لوړ شو او د مالیاتو اندازه یې له ۰،۵ څخه ۰،۳ سلنې ته را کمه شوه. همدارنگه پرو سږ کال کې د ښوونیز او تحصیلي سکتور د پیاوړتیا په موخه، د یوه کال لپاره د هغوی انتفاعی مالیه معاف شوه. دغه راز د روغتیا سکتور انتفاعي مالیه له ۴ سلنې څخه ۳ سلنې ته را کمه شوه او نوي رامنځته شوي روغتیایي مرکزونه د یو کال لپاره د انتفاعي مالیې له ورکړې څخه معاف او په دویم کال د ۲ سلنه او له هغه وروسته د ۳ سلنه انتفاعي مالیې تابع گرځول شوي وو.