مالیې وزارت ۱۴۰۲ مالي کال له لاسته راوړنو ډک او بریالی کال بللی دی.
له یاد وزارت څخه په خپره شوې خبرپاڼه کې ویل شوي، پر هېواد د یو لړ بهرنیو مالي محدودیتو سربېره بیا هم له مالي پلان سره سم ۱۴۰۲ کال په مالي او اقتصادي لحاظ له لاسته راوړنو ډک و.
د خبرپاڼې له مخې، په ۱۴۰۲ مالي کال کې د مالیې وزارت له لوري ملي عواید په روڼ ډول راټول شول، ملي بودیجه په گټوره توگه مدیریت شوه، د دولت ټول عادي او پراختیايي لگښتونه چې د پروسږکال په پرتله ډېر وو، په ټاکلي وخت اجراء شول.
په خبرپاڼه کې ویل شوي، د ملي بودیجې په مټ یو لړ مهمې اقتصادي پروژې پلې شوې، چې سوداگري پراختیا ومونده او په ټولیز ډول د پرو سږکال په پرتله د هېواد اقتصادي وضعیت ښه والی وموند.:«په ټوله کې ۱۴۰۲ مالي کال د پرو سږکال په پرتله په ملي کچه د مالي مدیریت او اقتصادي پیاوړتیا په برخه کې له لاسته راوړنو او پرمختگونو څخه ډک کال وو، چې له گټو تجربو څخه به یې په ۱۴۰۳ مالي کال کې د ملي اقتصاد د لا پیاوړتیا په موخه په بېلابېلو مهمو برخو کې گټه واخیستل شي.»
مالیې وزارت داسې مهال پرو سږکال له لاسته راوړنو ډک کال بولي، چې اوسمهال له افغانستان سره د پخوا په پرتله مرستې نه کېږي او د افغانستان مالي اړتیاوې د کورنیو سرچینو څخه پوره کېږي.