محمد فیصل
ماډرن ډيپلوماسي خپرونې په ۱۴۰۲ کال کې په دیپلوماتیکه برخه کې د افغان حکومت په لاسته راوړنو باندې یوه مقاله خپره کړې.
لیکوال جورجي استارین لیکلي چې تیر کال د طالبانو دیپلوماتانو په هند کې د سفارت او کونسلګریو کنټرول ترلاسه کړ او ترکمنستان د طالبانو نوم د ترهګرو ډلې له لست څخه وویست.
دغه راز، چین لومړنی هیواد و چې کابل ته یې خپل رسمي سفیر واستوه او بیجنګ ته د طالبانو استازی ورسید.
سربیره پر دې، د هالینډ او هسپانیې په ګډون د جمهوري نظام ځینو دیپلوماتیکو استازولیو د طالبانو حکومت سره روابط ټینګ کړي دي.
د مقالې لیکوال وایي، د افغانستان د اسلامي امارت رهبري په ۱۴۰۲ کال کې په ټولو برخو کې، په ځانګړي ډول له نورو هیوادونو سره د اړیکو پراختیا کې په خپلو لاسته راوړنو ویاړي.
مقاله وایي، اوس مهال اسلامي امارت په بیلابیلو هیوادونو کې ۳۸ فعالې استازولۍ لري او اذربایجان هم په کابل کې خپل سفارت د پرانستو اراده څرګنده کړې ده.
شنونکي وایي، ۱۴۰۳ کال به د طالبانو د حکومت د رسمیت او نه رسمیت پیژندلو له پاره مهم وي.
مقاله کې له پاکستان سره اړیکو کې وروستۍترینګلتیا ته هم اشاره شوې ده.
د یادونې وړ ده، پاکستان وایي چې د افغانستان خاوره د پاکستان پر ضد استعمالیږي، خو کابل وایي چې خاوره یې د هیچا پر ضد نه استعمالیږي.
افغان حکومت په ځانګړي ډول پاکستان ته وایي چې د خپلې نا امنۍ تور دې پر افغانستان نه لګوي، خپل امنیت دې په خپله وساتي او کورني مسایل دې کور دننه حل کړي.افغان حکومت نه یوازې دیپلوماتیکه برخه کې بلکې اقتصادي برخه کې هم تیر کال ګڼې لاسته راوړنې درلودې.
له چین سره اقتصادي اړیکو پراختیا او تړونونو لاسلیک، د چاه بهار بندر له لارې د سوداګرۍ پراختیا، منځنۍ اسیا سره سوداګریزو اړیکو ته وده ورکول، د کانونو استخراج او بریښنا پروژې یې د تیر کال ځینې مهمې اقتصادي لاسته راوړنې دي چې د افغانستان اقتصاد غوړولو کې یې مهم رول لوبولی دی.