د افغان حکومت ویاند مولوي ذبیح الله مجاهد وایي، چې د پاکستاني طالبانو شتون له افغان حکومت سره هیڅ تړاو نهلري او په خبره یې، دا د پاکستان خپله ستونزه ده او بايد په کور د ننه ورته حل لاره پيدا کړي.
ښاغلی مجاهد زیاتوي، په پاکستان کې ځانګړو پوځي کړيو ته په افغانستان کې مرکزي حکومت، امنيت، اقتصاد، پرمختګ او په ټوله کې سوله او ثبات خوند نه ورکوي.
د نوموړي په وینا، یاده کړۍ تل د افغانستان د ناامنۍ، اشغالونو، کډوالۍ او مجبوريتونو څخه ګټه پورته کړې ده، نن بيا غواړي د يو لړ بهانو په لټولو سره له افغانستان سره ځان په ستونزه کې ښکېل کړي.
وایي، مونږ پوهيږو، چې د دغې ځانګړې پوځي ډلې له پالیسیو سره د پاکستان ولس او علماء جوړ نه دي.