د افغان حکومت ویاند ذبیح الله مجاهد د مونیخ په غونډه کې د نړۍ د ۱۲ هېوادونو د بهرنیو چارو وزیرانو گډې اعلامیې ته غبرگون ښودلی او د دوی اندېښنې یې بېځایه بللي دي.ښاغلي مجاهد پر خپلې اېکسپاڼه لیکلي، افغانستان له کلونو وروسته امن دی او هېڅ بهرنۍ ډله دلته نشته او نه هم په افغانستان کې د فعالیت اجازه ورکول کېږي.:« د اسلامي امارت په دوه نیم کلن حکومت کې له افغانستان څخه هېڅ کوم هېواد ته گواښ نه دی شوی. تشویش خپرول او له افغانستان څخه د تهدید او وېرې احساس پیدا کول، یا د هېوادونو د معلوماتو کمزوري په ډاگه کوي او یا خو ځینې مغرضې کړۍ په لوی لاس داسې غونډو ته ناسم معلومات لېږدوي او د افغانستان په اړه ناسم انځور وړاندې کوي.»د مجاهد په خبره، که توطیه اچوونکي هر څومره پروپاگند وکړي، د افغانستان پرمختگ به دوام کوي او د نورو اعلامیو ته په تمه نه پاتې کېږي.:« د نشهيي توکو کښت صفر شوی، د هېواد اقتصاد پرمختگ کړی، د افغانۍ ارزښت ساتل شوی، لویې پروژې پیل شوي، په روغتیايي، ښوونیزو او د بیارغونې په برخه کې ښه کارونه روان دي.»نوموړي ویلي، له دومره ډېر پرمختگونو سربېره بیا هم د افغانستان انځور خراب وړاندې کول د نړۍ د هېوادونو ناخبري ده.د نړۍ د دولسو هېوادونو د بهرنیو چارو وزیرانو د مونیخ په امنیتي غونډه کې د افغانستان په اوسني وضعیت اندېښنه ښودلې وه. د مونیخ غونډې په اعلامیه کې له افغان حکومت غوښتل شوي وو چې نړیوالو قوانینو ته دې درناوی وکړي.
مجاهد: نړیوال دې بېځایه اندېښنې نه کوي
#image_title