څو ورځې وړاندې له افغانستان څخه فراري، ناکامه او بدنامه سياسي څهرو د «ملي مجمع» په نوم د يو نوي مجازي ائتلاف د تشکيل او موجوديت اعلان وکړ.
د هندوکشغږ سرچينو له خپلو منابعو څخه د دې ائتلاف له تشکيل مخکې او اوسني وضعيت څخه ځينې مهم معلومات ترلاسه کړي دي او له ډيرو ناويلو څخه يې پرده پورته کړې ده.
د سرچينو په وينا، دغه نوی ائتلاف د يونس قانوني، عطاء محمد نور، محمد محقق، عبدالرشيد دوستم، سياف او په مقاومت شوری کې د ځينو نورو څهرو د ابتکار په نتيجه کې رامنځته شو چې د ښکاره او اعلان شویو موخو تر څنګ يې ځينې پټې خو اصلي موخې هم درلودې، د دغو پټو خو اصلي موخو له جملې څخه يې يوه د احمد مسعود په مشرۍ د مقاومت جبهې د مشر چې په دې وروستيو کې يې کرار کرار رشد کاوه؛ کنټرولول او د رشد مخه نيول وو او بله مهمه موخه يې دا وه چې ځينې مهم جريانونه له ځان سره يو ځای خو د هغوی له شتون څخه په استفادې سره بهرنيو هيوادونو ته ځانونه او مقاومت شوری مطرح کول دي.
احمد مسعود چې د تېر پرځېدلي جمهوريت په وخت کې هم ورته د ذکر شویو کسانو له ډلې د ځينو لخوا ورته مشکلات جوړېدل او احمد مسعود به يې خپلو موخو ته په آسانۍ نه پرېښود، د تېر پرځېدلي جمهوريت له سقوط وروسته چې کله احمد مسعود د مقاومت جبهه رامنځته کړه او په فعالیت یې پیل وکړ؛ نو د ډيرو خارجي هيوادونو تمرکز هم پرې زيات شو نو د ملي مقاومت شوری اصلي لوبغاړي ورڅخه په اندېښنه کې شول نو ځکه يې د احمد مسعود د کنټرول په اړه په نویو لارو چارو غور مهم وباله.
سرچينې زياتوي: په تېرو نږدې دوه نيمو کلونو کې په ملي مقاومت شوری کې د مقاومت جبهې او د شوری د نورو غړو تر منځ د اختلاف او تقابل ګڼ شمېر موارد رامنځته شول، له احمد مسعود څخه ناراحتۍ د جمعیت اسلامي د انشعابي څانګې مسؤول عطاء محمد نور دېته اړ کړی چې دوه ځله له شوری سره مخه ښه وکړي، د شوری له نورو غړو سره د اختلاف نظر له امله اسماعيل خان نږدې يو کال شوری پرېښودله او د شوری ټول غړي يې غله، مفسدين او خائنین بلل.
دغه راز له احمد مسعود سره د اختلافاتو له امله د جمعیت اسلامي مسؤول او د برهان الدين رباني زوی تر اوسه په شوری کې له ګډون ځان ګوښه کړی دی، عبدالرشيد دوستم هم دوی په مختلفو تورونو او انحصار طلبيو تورن کړل آن تر دې چې د احمد مسعود په پلار احمد شاه مسعود يې هم د انحصار طلبۍ او تعصب تورونه ولګول چې په وړاندې يې قانوني کلک غبرګون وښود او آن له شوری څخه د پرېکون ګواښ يې وکړ.
دغه راز څو ځله د شوری په مجالسو کې د عطاء محمد نور او احمد مسعود له نماينده فضل احمد معنوي تر منځ اختلاف تر لوړې کچې رسېدلى دی چې وروستۍ يې د ملي مجمع د تشکيل په اړه د فضل احمد معنوي او عطاء محمد نور اختلاف او يو د بل په وړاندې مخامخ دریځ نیول و، چې بالآخره د دې اختلاف څخه امرالله صالح هم په امن نه شو او د عطاء محمد نور لخوا په ښکاره ډول وښکنځل شو.
د هندوکشغږ د سرچينو د معلوماتو په اساس احمد مسعود او فضل احمد معنوي چې د شوری د غړو دا بد نيت درک کړ نو په ښکاره ډول يې د مجمع ملي د تشکيل سره مخالفت پيل کړ، تر دې چې د مجمع د موجوديت په وخت يې نه خپله پکې ګډون وکړ او نه يې هم خپل کوم استازی ورمعرفي کړ؛ هندوکشغږ ته رسېدلي معلومات ښيي چې د همدې اختلافاتو له امله اسماعيل خان هم د ملي مجمع د موجوديت د اعلان مجلس ترک کړ.
د مجمع د اصلي موخو د درک په سبب احمد مسعود له پيله هم ورسره مخالف وو او هم يې ګډون پکې ونه کړ، د حنيف اتمر ټيم چې دوی به په خپلو منځو کې د «شيطان» او د «انګليس جاسوس» خطاب ورته کاوه؛ د موجوديت له مخه بايکاټ ورسره وکړ، د رحمت الله نبيل حزب د مجمع له تشکيل څخه څو ورځې وروسته بيرته خپل پرېکون ورسره اعلان کړ، دغه راز د صادق مدبر په مشرۍ چې د شوری په مجالسو کې يو غير مؤثر او بې خلکو حزب بلل کېده؛ د ملي انسجام حزب هم له مقاومت شوری او هم د ملي مجمع سره پرېکون وکړ.
دا چې دا نوی ناکام او له پيله متزلزل ائتلاف به په خپل دې هدف کې چې د احمد مسعود کنټرولول دي څومره بريالی وي وخت به يې ثابته کړي، خو د تحليلګرانو په باور دا ائتلاف به هيڅکله د احمد مسعود په کنټرول او د اغيزمتيا په راکمولو او د نورو احزابو او جريانونو په راخپلولو کې بريالی نه شي، ځکه چې هر يو مختلف فکرونه، اهداف او د تعصب پخوانۍ مخينه لري، پر دې سربېره هر جريان د یوه جلا بهرني استخباراتي سازمان لخوا تغذيه کېږي نو ځکه د دې ډول چترونو تشکيل يو ستونزمن او غير مؤثر کار دی خو نتيجه يې هيڅکله مثبته نشي کېدای.