د پاکستاني طالبانو غورځنګ ویاند محمد خراساني له «اڼډس انلایسټ» ادارې سره په ځانګړې مرکه کې د بلوچستان ازادي غوښتونکو ډلو او په ځانګړي ډول د BLA او BLF وسلهوالو مبارزه مشروع بللې او په وینا یې: «دا ټول د خپلو مشروع حقونو لپاره مبارزه کوي او دا مهال چې دوی کومه دعوه لري او کومه وسلهواله مبارزه کوي، هغه سمه ده او زموږ د اهدافو پر وړاندې خنډ نه بلکې ګټوره ده.»
ښاغلي خراساني، د خبرو پر دوام ویلي، چې که دوی (پاکستاني طالبان) په بلوچستان کې واک ترلاسه کړي، نو له ټولو ډلو سره به د تفاهم له لارې ستونزې حل کړي.
د پاکستاني طالبانو غورځنګ ویاند محمد خراساني، د کشمیر مسئلې، په ځانګړي ډول د کشمیر د وسلهوال مقاومت په اړه د یاد غورځنګ د دریځ په اړه ویلي، چې یاده مسئله د وخت په تېرېدو سره لا پېچلې شوې او په وینا یې، د دې مسئلې په سر سوداګرۍ او معاملې له هیڅ چا څخه پټې نه دي.
ښاغلي خراساني د خبرو پر دوام د کشمیر مسئله د کشمیري ولس د اختیار مسئله بللې او ویلي دي چې دوی به له حاکمیت وروسته د کشمیري قوم په خوښه او تفاهم سره د دې ستونزې د حل لاره غوره کړي.
خراساني د یادې ادارې دې پوښتنې ته که هند پر پاکستان یرغل وکړي، نو په داسې حالت کې د پاکستاني طالبانو غورځنګ څه دریځ لري؟ په ځواب کې ویلي: «د هند او پاکستان ترمنځ چې څومره اختلافات او شخړې دي، دا د دواړو هېوادونو د مغرضو عناصرو له لوري د نړیوالو قوتونو د اهدافو لپاره رامنځته شوي او په وینا یې دا ستونزې د دواړو ملتونو او عامو خلکو ترمنځ هیڅ اصلي تړاو نه لري.»
ښاغلي خراساني زیاته کړې، په دغو اختلافاتو او جګړو کې عام ولس او په ځانګړي ډول مسلمانان قرباني کېږي. ښاغلي خراساني ټینګار کړی چې د پاکستاني طالبانو غورځنګ د دواړو هېوادونو د هغو اقداماتو ملاتړ نه کوي چې د خپلو سیاسي او اقتصادي ګټو لپاره پر عام ولس ظلم وکړي.
د یادونې وړ ده، چې د پاکستان په بېلابېلو سیمو کې د پاکستاني طالبانو غورځنګ وروستي پرمختګونه یاد غورځنګ ته د خلکو پام ور اړولی او د خلکو طمعې ورته ډېرې شوي چې د دوی په مرسته به خپلو اساسي او بنسټیزو حقونو ته ورسېږي.